भांगरभूंय | प्रतिनिधी
गोंय, महाराष्ट्र हांचे खातीर 22 नोव्हेंबर सावन कोल्हापूरांत भरती
भांगरभूंय । प्रतिनिधी
पणजीः अग्निपथ येवजणे खाला गोंय आनी महाराष्ट्रांतल्या तरणाट्यांची भरती करचे खातीर कोल्हापूरांत आर्मी भरती कार्यालया वतीन 22 नोव्हेंबर ते 11 डिसेंबर ह्या काळांत कोल्हापूरच्या शिवाजी विद्यापिठाच्या खेळां मैदानाचेर भरती मेळाव्याचें आयोजन केलां.
गोंय आनी महाराष्ट्रांतल्या तरणाट्यांक अग्निपथ येवजणे खाला भरती खातीर मार्गदर्शन करपा सयत रोजगार निर्मितीच्या हेतून ह्या मेळाव्याचें आयोजन केलां. महाराष्ट्रांतल्या कोल्हापूर, सातारा, सिंधुदुर्ग आनी रत्नागिरी ह्या पांच जिव्ह्यांतल्या तशेंच गोंयांतल्या उत्तर गोंय आनी दक्षीण गोंय ह्या दोनूय जिल्ह्यांतल्या तरणाट्यां खातीर ही भरती आसतली.
इत्सूक उमेदवारांनी भारतीय लश्कराचे www.joinindianarmy.nic.in हे वेबसायटीचेर नोंदणी करून ऑनलायन अर्ज करप गरजेचें आसा. ज्या उमेदवारांनी येसस्वी तरेन ऑनलायन नोंदणी केल्या तांकां प्रवेशपत्र तांचे ईमेल आयडीचेर धाडटले, अशी म्हायती पीआयबीन दिल्या.
मजगतीं, अधिसुचोवणेंत दिल्लीं कागदपत्रां (मूळ शिक्षणीक प्रमाणपत्रां, गरजेच्यो फोटो कॉपी, नमुन्या प्रमाण वैध प्रतिज्ञापत्र, जात प्रमाणपत्र) ऑनलायन नोंदणी करतना वांगडा दवरपाची सुचोवणी केल्या. योग्य तरेन भरिल्ल्या प्रतिज्ञापत्रा बगर खंयच्याच उमेदवाराक प्रवेश दिवचे नात. उमेदवारांनी मुळावी वैजकी पूर्वतपासणी करप गरजेची आसा. अग्निवीरांची पिराय नांव नोंदणी दिसा साडेसतरा वर्सां ते 21 वर्सां मेरेन आसप बंधनकारक आसा. फकत 2022 चे बॅची खातीर चडांत चड मर्यादेंत सूट दिवन पिराय 23 वर्सां मेरेन केल्या. अदीक म्हायती खातीर www.joinindianarmy.nic.in हे वॅबसायटीचेर वा 0231- 2605491 ह्या नंबराचेर संपर्क करचो असो उलो भरती कार्यालयान मारला.
ह्या पदां खातीर जातली भरती
अग्निवीर सामान्य सेवा (सगळे फाटे), अग्निवीर तांत्रीक कर्मचारी, अग्निवीर लीपीक- भांडार वेवस्थापक, तांत्रीक विभाग- वस्तुसूची वेवस्थापन (सगळे फाटे), अग्निवीर कुशळ कारागीर (यत्ता धावी पास) (सगळे फाटे), अग्निवीर कुशळ कारागीर (यत्ता आठवी पास) (सगळे फाटे), (हावसकिपर आनी मेस किपर).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
