भांगरभूंय | प्रतिनिधी
सुमेर डिकुन्हा हांची लेफ्टनंट जनरलपदार बडटी
भांगरभूंय । प्रतिनिधी
पणजीः भारतीय लश्करान गोंयचो मान वाडयला. मेजर जनरल पदार सेवा दिवपी सुमेर इव्हान डिकुन्हा हांकां लेफ्टनंट जनरल पदार बडटी दिल्या. ताका लागून आतां ते नवी दिल्लींतल्या लश्करी मुख्यालयांत हवाई दलाच्या म्हासंचालक पदाची जापसालदारकी सांबाळटले. विशेश म्हणल्यार डिकुन्हा हांचो फक्त 13 म्हयनयांत ब्रिगेडियर ते मेजर जनरल ते लेफ्टनंट जनरल असो बडट्यांच प्रवास जाला.
लेफ्टनंट जनरल डिकुन्हा हे इंडियन मिलिटरी अकादमी, डेहराडूनचे आदले विद्यार्थी. डिसेंबर 1998त हवाई दळांत ते रुजू जाल्ले. ते कुडटरीचे, सर्गेस्त मेजर जनरल इव्हान डिकुन्हा आनी जेम्मा पिंटो हांचे पूत. जेम्मा हांकां लेखक, शिक्षक आनी एक व्यक्तिमत्व विकास प्रशिक्षक म्हूण नांव आसा.
सुमेर हे एक बरे अभियंते. इन्स्टिट्यूट ऑफ आर्मामेंट टॅक्नोलॉजींतल्यान ते टॅक्निकल स्टाफ ऑफिसर्स अभ्यासक्रमाचे पदवीधर आसात. तांणी आर्मी वॉर कॉलेज, महू आनी नॅशनल डिफेन्स कॉलेड नवी दिल्ली हातूंत हायर कमांड अभ्यासक्रमांत शिक्षण घेतलां.
लेफ्टनंट जनरल डिकुन्हा हांणी आपले सेवेंत आयज मेरेन उत्कृश्ट कर्मचाऱ्यांच्यो नेमणुको केल्यात. तांच्या कमांड नेमणुकां मदीं मिसायल कमांड, वेस्टर्न सेक्टरांतलो अॅर डिफेन्स ब्रिगेड आनी जनरल ऑफिसर कमांडींग, मध्य प्रदेश सब एरिया हांचो आस्पाव आसा. जम्मू आनी काश्मीरांतल्या असिस्टंट क्वार्टर मास्टार जनरल आनी आसामांत डेप्युटी जनरल ऑफिसर कमांडींग पदांचेर तांणी मुखेल कर्मचाऱ्यांच्यो नेमणुको केल्यात.
लेफ्टनंट जनरल डिकुन्हा हांकां तांचे कारकिर्दींत दोनदां प्रतिश्ठीत प्रशस्तीपत्रां मेळ्ळ्यांत. इराणआंतल्या भारतीय दुतावासांत भारताचे लश्करी आनी हवाई संलगन्क म्हूण विदेशांत तांची नेमणूक जाल्ली. तांणी रडार्स आनी मेटलर्जींत एमएससी, संरक्षण आनी धोरणात्मक अभ्यासांत एम. फील आनी वेवस्थापन विशयांत पीएचडी करून तांचो शिक्षणीक प्रवास चालू दवरला. सुमेर हांची घरकान्न फराह ही मेजर जनरल युस्टेस फर्नांडीस हांची चली. युस्टेड हे काश्मीरांत आतंकवाद्यां कडेन झुजतना शहीद जाल्ले. सुमेर आनी फराह हांचो चलो अर्जून हांणी आयआयटी पुराय केल्या. चली अंजली ही पेशान वकील आसा तशेंच उत्कृश्ट पियानो वादक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
