भांगरभूंय | प्रतिनिधी
फाऊस्तो वि दा कॉस्ताः दाल्गादान मनयलो पत्रकारिता दीस
भांगरभूंय । खबरां मेज
पणजीः कोंकणी मळार एका काळार वायब्रंण्ट पत्रकारिता वसताली. ती आयज वसना. ती परतून चालू जावपाची गरज आसा. हें काम तरणाट्यांनी आपल्या भुजांचेर घेवपाक जाय. आयज शिकप्यां खातीर अश्यो कोंकणीच्यो कार्यावळी दाल्गादो कोंकणी अकादमी (डीकेए) घडोवन हाडटा. ही एक बरी दिशा. म्हालगड्यांनी तरणाट्यांक कोंकणी पत्रकारितेच्या मळार उर्बा दिवपाक जाय. तेंपा प्रमाणे माथ्याक कुरपणें म्हणटात, ते भशेन कोंकणी मळार डिजिटल पत्रकारिता अदीक- अदीक फांकारूंक जाय. हें सगळें घडयतलें जाल्यार पयले सुवातेर गोंयकारांनी सगळ्यां मळांनी कोंकणी भास वापरूंक जाय. कोंकणी भाशेक आपले जिणेंत प्राधान्य दिवपाक जाय, जें आयज कोंकणीक मेळना. तरणाट्यांनी हाचेर लक्ष दिवपाची गरज आसा, अशें गुलाब म्हयन्याळ्याचे संपादक फाऊस्तो वि दा कॉस्ता हांणी म्हणलें.
दाल्गादो कोंकणी अकादमीन गोंयच्या झुवारी नगरांतल्या एमर्इएस वसंत जोशी कला आनी वाणिज्य म्हाविद्यालयांत कोंकणी पत्रकारिता दीस मनयलो. हे कार्यावळीक डॉ. मनस्वी एम कामत, पत्रकार डॅनियल डि सौजा, संपादक फाऊस्तो वि दा कॉस्ता, संपादक एलिस्टर मिरांदा, पत्रकार सावियो डायस, सचीव फा. मायरन जेसन बार्रेटो, सत्यवान नायक हाजीर आशिल्ले.
पुराय कार्यावळीचे निमंत्रक म्हूण डॅनियल डि सौजा हांणी पत्रकारिते मुखार आशिल्लीं आव्हानांचेर आपल्या उलोवपांत उजवाड घातलो. 2 फेब्रुवारी हो दीस कोंकणी भाशेच्या इतिहासांत एक म्हत्वाचो मैलाचो फातर थारता. 1889 त एदुवार्द जोस ब्रुनो द सौज हांणी संपादीत केल्लें, ‘उदेंतीचें साळक’ हें पयलें कोंकणी दिसाळें उजवाडाक आयलें. हें अग्रगण्य प्रकाशन रोमी लिपींत कोंकणींत छापून आयलें, अशें तांणी सांगलें.
ह्या वेळार ‘पत्रकारितेच्या मळार आशिल्ल्या आव्हानांचो सोद’ ह्या विशयांचेर ओ हेराल्डाचे संपादक एलिस्टर मिरांदा, गुलाब म्हयनाळ्याचे संपादक फाऊस्तो वि दा
कॉस्ता, प्रुडंट मिडियाचे पत्रकार सावियो डायस हांची भासाभास जालीं. मानेस्तांनी रोमी कोंकणी दिसाळ्यांची गरज उक्तायली. प्राचार्य डॉ. मनस्वी एम. कामत हांणी येवकार दिलो. सचीव फा. मायरन जेसन बार्रेटो हांणी उपकार मानले. नलिशा वेळीप हांणी सुत्रसंचालन केलें. राष्ट्रगीतान कार्यावळीचो समारोप जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.