भांगरभूंय | प्रतिनिधी
पणजी ः फाटल्या कांय म्हयन्यांत राज्यभर आनी देशांतल्या शेअर बाजारांतल्या गुंतवणुकींनी उतार-चढाव दिसून आयलां. पूण मार्च आनी एप्रील 2025 ह्या दोन म्हयन्यांत परतून गुंतवणूक वाडली. खास करून ह्या काळांत गोंयकारांच्या म्युच्युअल फंड गुंतवणुकींनी व्हड प्रमाणांत वाड जाल्या.
असोसिएशन ऑफ म्युच्युअल फंड्स इन इंडिया (एएमएफआय) हे संस्थेन उजवाडायल्ल्या अहवाला प्रमाण, फेब्रुवारी 2025 च्या निमाणे मेरेन गोंयांतल्यान म्युच्युअल फंडांत वट्ट 36,300 कोटी रुपयांची गुंतवणूक जाल्या. एप्रील 2025 च्या निमाणे मेरेन हो आंकडो 700 कोटी रुपया वाडून 37,000 कोटी रुपया जाला.
फेब्रुवारी 2025 च्या निमाणे मेरेन गोंयांत दर व्यक्तीन 2 लाख 33 हजार 90 रुपया म्युच्युअल फंडांत गुंतयले. एप्रील 2025 च्या निमाणे मेरेन हो आंकडो वाडून दर व्यक्तीन 2 लाख 37 हजार 640 जालो. हो आंकडो देशांतलो सगळ्यांत चड आसा. दर मनशाचे गुंतवणुकीचे नदरेन महाराष्ट्र 2 लाख 28 हजार 110 रुपया गुंतवणूक करून दुसरे सुवातेर आसा. केंद्रीय प्रदेशां मदीं दिल्ली दर व्यक्ती 2 लाख 82 हजार 980 रुपया गुंतवणूक करून आघाडीर आसा.
एप्रील 2025 च्या निमाणे मेरेनच्या आंकडेवारी प्रमाण, गोंयांतल्या वट्ट 37,000 कोटी रुपयांचे गुंतवणुकींतल्यान सगळ्यांत चड 72.56 टक्के म्हळ्यार 26,884 कोटी रुपयांची गुंतवणूक इक्विटी स्कीम्सांत जाल्या. हाचे भायर डेबिट ओरिएंटेड स्कीम्सांत 4,736 कोटी, लिक्विड स्कीम्सांत 1,445 कोटी, आनी हेर स्कीमींनी सुमार 5,000 कोटी रुपया गुंतयल्यात. पुराय देशाचो विचार केल्यार एप्रील 2025 च्या निमाणे मेरेन म्युच्युअल फंडांत वट्ट सुमार 69.49 लाख कोटी रुपयांची गुंतवणूक जाल्या.
बायलां गुंतवणूकदारांची टक्केवारी उणी जाता
क्रिसिल संस्थेच्या अहवाला प्रमाण, जून 2024 च्या निमाणे मेरेन गोंयांतल्या वट्ट म्युच्युअल फंड गुंतवणुकदारांत 40 टक्के बायलां आशिल्ली. पूण एप्रील 2025 वर्सा ही टक्केवारी 37.2 टक्क्यां मेरेन देंवल्या. एप्रील 2025 च्या निमाणे मेरेन बायलां गुंतवणूकदारांची राष्ट्रीय सरासरी 25.1 टक्के आशिल्ली. मिझोरामांत सगळ्यांत चड बायलां गुंतवणूकदारांची संख्या 44.1 टक्के नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
