भांगरभूंय | प्रतिनिधी
सोशल मिडियाचेर गुरवारपण आनी प्रसुती उपरांतचे फोटो घालपाचो ट्रेंड नेटान चलता. पूण ह्या चडशा फोटवांनी बायलो प्रसुती उपरांत लेगीत फिट दिसतात. तांच्या पोटाचेर स्ट्रेच मार्क्स वा ऑपरेशन मार्क्स दिसनात. पूण हें वास्तव न्हय. ऑस्ट्रेलियेच्या सिडनी विद्यापिठांत केल्ल्या अभ्यासा प्रमाण, बाळंतपण जाले उपरांत सोशल मिडियाचेर घाल्ले फोटो वास्तव न्हय. तातूंतले जायते फोटो हे फोटोशॉप केल्ले. तंत्रगिन्यानाक लागून तांची सोबीतकाय वाडटा.
संशोधकांनी प्रसुती उपरांतच्या कुडीच्या हॅशटॅगान इंस्टाग्रामाचेर आशिल्ल्या 600 फोटवांची तपासणी केली. ह्या फोटोंवातल्यान फकत 5% फोटवांनी ऑपरेशनाक लागून तयार जाल्ले स्ट्रेच मार्क वा दाग दिसून आयले. ‘रिसेन्ट’ आनी ‘टॉप’ पोस्ट वर्गांतले 91% फोटो बारीक वा सरासरी वजनाच्या बायलांचे आसात. वेगवेगळ्या सॉफ्टवेअराच्या आदारान हीं चित्रां सोबीत करतात. जायत्यां फोटवांनी ब्युटी फिल्टरय बसयल्ले आसात.
जर्नल ऑफ हेल्थकेअर रिसर्चांत उजवाडाक आयिल्ल्या संशोधनाची मुखेल संशोधक आनी सिडनी विद्यापिठाची प्राध्यापिका डॉ मेगन गौ म्हणटा, सोशल मिडियाचेर दिसपी प्रतिमा एके तरेचो भ्रम निर्माण करता. गुरवारपणांत बायलांक पयलींच दबाव आसतात. सोशल मिडियाचेर हे फोटो पळोवन तांकां चड ताण येता. बाळंत जावनूय आपूण तिचे सारकी सुंदर दिसचें, म्हजे कुडीचेर स्ट्रेच मार्क्स दिसना जाल्यार पुरो, अशें तांकां दिसता.
नव्या मतांक लागून तांच्या आंगांत असंतोशाची भावना निर्माण जावपाक लागल्या. जायते फावटीं तिका प्रसुती उपरांत उदासीनताय आनी हुस्को जाता. इंस्टाग्राम सारकिल्ल्या सोशल सायटींचेर डिलिव्हरी उपरांतचे फोटो पळयत ती स्वताक सांगता, म्हाकाय सुपर फिट आनी बारीक जावपाची गरज आसा. भुरग्यांक दुदाक धरतना लेगीत ती आपल्या फिगराचो विचार करता.
परिस्थिती इतली वायट जाल्या की ऑस्ट्रेलियान प्रसुती पयलींच्यो चिंता आनी उदासीनताये खातीर वेगळी हेल्पलायन लेगीत सुरू केल्या. सोशल मिडियाचेर डिलिव्हरी उपरांतचे सोबीत फोटो पळोवन बायलांनी स्वताचेर टिका करपाक सुरवात केल्या अशें हेल्पलायनीची मुखेल कार्यकारी अधिकारी ज्युली बोर्निनकोफ सांगता. तांकां समजावप गरजेचें आसा की, ह्या काळांत दरेक बायलेक चड करून सारकेच बदल जातात.
सिडनीची क्लिनीकल सायकोलॉजिस्ट कॅथ्रीन सॉंडर्स म्हणटा, नव्या आवयच्या मनांत कितें बरें तें रुजोवप म्हत्वाचें. 3 वर्सां पिरायेच्या चलयेची आवय आनी फिटनेस तज्ञ ज्युली फ्रीमॅन म्हणटा, बाळंतपण केल्या उपरांत सोशल मिडियाचेर आपली कूड दाखोवप बरोबर न्हय. उरफाटें त्या काळांत जावपी बदलांचेर गुरवार बायलांनी उलोवप केले बरें. मात हें सगलींच बायलां वा आपलीं सौंदर्य प्रसाधनां खपोवपाक सोदपी कंपनीं आयकतात खंय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
