गुन्यांव आडावपाक लोकांचो आदार गरजेचो

हिरो मोटोक्रॉपा वतीन पुलीस विभागाक 100 दुचाकी भेटोवपाच्या सुवाळ्यांत बावटो दाखयतना मुख्यमंत्री डॉ. प्रमोद सावंत. कुशीक पुलीस म्हासंचालक डॉ. जसपाल सिंग, पुलीस म्हानिरिक्षक ओमवीर सिंग बिश्नोई, हिरो मोटोक्रॉपाचे विक्री वेवस्थापक रोहीत देशमुख आनी हेर मानेस्त. (नारायण पिसुर्लेकार)

भांगरभूंय | प्रतिनिधी

मुख्यमंत्री डॉ. प्रमोद सावंतः हिरो मोटोक्रॉपा वतीन पुलीस विभागाक 100 दुचाकी

भांगरभूंय । प्रतिनिधी

पणजीः गोंयांत गुन्यांव तपासाचें प्रमाण 94 टक्के आसा. मात गुन्यांवांचें प्रमाण उणे जावप गरजेचें आसा. ती पुराय जापसालदारकी पुलीस विभागाची आसा. तरी लेगीत लोकांच्या आदारानूच गुन्यांव आडावप शक्य आसा. हेच खातीर लोकांच्या आदाराची गरज आसा, अशें मुख्यमंत्री डॉ. प्रमोद सावंत हांणी सांगलें.

हिरो मोटोक्रॉपा वतीन पुलीस विभागाक 100 दुचाकी भेटयल्यो. हे कार्यावळी वेळार मुख्यमंत्री डॉ. सावंत उलयताले.

गोंयांत बायलां वयल्या लिंगीक अत्याचाराचीं जितलीं प्रकरणां मुखार आयल्यात, त्या सगळ्यांची सरासरी आकडेवारी पळयली जाल्यार 90 परस अदीक अत्याचार हे वळखीच्या मनशान केल्ल्याचें स्पश्ट जालां. हेच खातीर आपल्या घरांत कोणाक रावपाक दिवपाचें, ताचो निर्णय लोकांनी घेवपाक जाय. अनोळखी लोकांक आपल्या घरांत रावपाक दिवचे न्हय. लोकांनी हे बाबतींत सतर्क रावपाची गरज आसा, अशें मुख्यमंत्री डॉ. सावंत हांण सांगलें.

गांवगिऱ्या वाठारांतले कांय तरणाटे बेगीन पयशे जोडपाचे आशेन घुंवळी वखदां विक्री वेवसायांत वचपाक लागल्यात. म्हाल, जिल्हो पांवड्याचेर हाचे आड विवीध कार्यावळी चालीक लायतात. तरणाट्यांनी ह्या अश्या हायसाक बळी पडचे न्हय, अशेंय मुख्यमंत्र्यान सांगलें.

मजगतीं, पुलिसां खातीर गृह विभागा कडल्यान साबार उपक्रम चलयतात. हिरोमोटोक्रॉपान कसलीच मागणी करिनासतना स्वता जावन ह्यो दुचाकी दिल्यात. ते खातीर तांचे विशेश उपकार. गोंयांतल्या हेर कंपनींनी लेगीत आपलो सीएसआर निधी सरकाराक दिल्यार शिक्षण, मुळाव्यो सुविधा तशेंच हेर मळांचेर भरीव काम करपाक मेळटलें, अशें मुख्यमंत्री डॉ. सावंत हांणी सांगलें. पुलीस म्हासंचालक डॉ. जसपाल सिंग हांणी आपल्या उलोवपांत कंपनीचे उपकार मानले. ह्या वेळार पुलीस म्हानिरिक्षक ओमवीर सिंग बिश्नोई, हिरो मोटोक्रॉपाचे विक्री वेवस्थापक रोहीत देशमुख आनी हेर मानेस्त हाजीर आशिल्ले.

ड्रंकन ड्रायव्हींगचीं 85 टक्के प्रकरणां उणावलीं

गोंयांतलीं ड्रंकन ड्रायव्हींगच्या प्रकरणांत सुमार 85 टक्क्यांनी उणीं जाल्यांत. रस्तो अपघात आडावपा खातीर सरकाराच्या येरादारी आनी भौशीक बांदकाम विभागा वतीन कांय उपाय चालीक लावपाक सुरवात केल्या. ताका लागून खुबूच सकारात्मक बदल जाणावपाक लागला. रोखडोच सविस्तर अहवाल सगळ्यां मुखार सादर करतले, अशें मुख्यमंत्री डॉ. प्रमोद सावंत हांणी सांगलें.

पुलीस दुचाकीक जीपीएस लावपाचो विचार

पुलीस दुचाकीक जीपीएस लावपाचो विचार चल्ला. म्हणजे ते खंय वतात, कितें करतात हाचेर लक्ष दवरपाक मेळटलें. तशेंच ब्रँड लेगीत विकसीत करपाक मेळटलो, अशें मुख्यमंत्री डॉ. प्रमोद सावंत हांणी सांगलें.