भांगरभूंय | प्रतिनिधी
भांगरभूंय । प्रतिनिधी
पणजीः गोंय श्रमीक पत्रकार संघटने वतीन (गुज) लोकमान्य टिळक हांच्या पुण्यतिथ निमतान ताकां आर्गां ओपपाची कार्यावळ जाली. कामगार आयुक्त राजू गांवस ह्या वेळार मुखेल सोयरे म्हणून हाजीर आशिल्ले.
गुजाच्या पाटो-पणजी हांगच्या श्रमशक्ती भवनांतल्या कार्यालयांत आयोजीत केल्ले कार्यावळींत राजू गांवस हांणी टिळकांचे पत्रकारितेची म्हायती दितना त्या तेपार तांणी घेतिल्ल्या आव्हानांचो उल्लेख केलो. कणखर पत्रकारिता करतना टिळकांनी तत्वां कडेन कशीच तडजोड केली ना. ताका लागून सामकार आयिल्ल्या परिणामांक सामकार वचपाची कशी तयारी तांणी दवोरलली हाचा म्हायती तांणी दिली.
टिळकांचें योगदान फकत पत्रकारिते इतलेंच मर्यादीत दवोरनास्तना बंगालचे फाळणेक खर विरोध करतना लाला लजपतराय, बिपिंनचंद्र पाल हांच्या भुजाक भूज लावन पुराय देश पेटयतना इंग्रज सरकाराक तांणी निर्णय फाटीं घेवपाक लायलें. अशे तांणी सांगले. गोंयांतल्या पत्रकारांच्यो कागाळी सुटाव्यो करपाचो प्रामाणीक यत्न करून कामगार आयुक्त कार्यालयना पत्रकारांच्यो 90 टक्के कागाळी सुटाव्यो करून तांकां न्याय मेळोवन दिला अशी म्हायती ताणी दिली.
सुरवेक लोकमान्य टिळकाच्या फोट्याक पुलां ओपून आनी दिवली पेटोवन कार्यावळीक सुरवात जाली. गुजाचो अध्यक्ष राजतिलक नायक हांणी सुरवेक प्रास्तावीक केलें. सरचिटणीस वासुदेव पागी हांणी सूत्रसंचालन केलें जाल्यार भांडारी कैसास नायकान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
