भांगरभूंय | प्रतिनिधी
इंडियन प्रिमियर लिगेचे (आयपीएल) 35वे मॅचींत गुजरात टायटन्सान घरच्या मैदानाचेर खेळटना दिल्ली कॅपिटल्स पंगडाक 7 विकेटींनी हारायलो.
ही मॅच जॉस बटलराचे आक्रमक बॅटिंगेन गाजली. ताणें नाबाद 97 धांवड्यांची खेळी केली. दिल्ली कॅपिटल्सान गुजरात टायटन्सा मुखार 204 धांवड्यांची मोख दवरिल्ली. हे मोखीचो फाटलाव गुजरातान 19.2 ओव्हरींनी 3 विकेटी व्हगडावन मेळयली. बटलराचो शेंकडो पुर्ण जावचे पयलींच गुजरातान मॅच जिखली. ताका लागून बटलराक विराट कोहलीच्या सगल्यांत चड आयपीएल शेंकड्यांच्या विक्रमाची बरोबरी करपाची संद चुकली.
आयपीएलांत सगल्यांत चड शेंकडे मारपाचे बॅट्समनांचे वळेरेंत कोहली 8 शेंकड्यां सयत पयले सुवातेर आसा. जाल्यार बटलर सात शेंकड्यां सयत दुसरे सुवातेर आसा. तिसरे सुवातेर वॅस्ट इंडिजाचो क्रिस गेल आसा. ताणें स सके मारल्यात.
गुजराता वतीन साई सुदर्शन आनी मुखेली शुभमन गील हांणी डावाची सुरवात केली. पूण, गील दुसरेच ओव्हरींत 7 धांवड्यांचेर धांवबाद जालो. करुण नायराच्या थ्रोचेर तो धांवबाद जालो. ते उपरांत साई सुदर्शन आनी बटलर हांणी डाव सांबाळ्ळो. तांणी दुसरे विकेटी खातीर 60 धांवड्यांची भागिदारी केली. आठवे ओव्हरींत कुलदीप यादवान सुदर्शनाक बाद करून ही जोडी फोडली. सुदर्शनान 21 बॉलांनी 5 चवके आनी एका सक्या सयत 36 धांवड्यांची खेळी केली.
तो बाद जाल्या उपरांत शेरफेन रुदरफोर्डान बटलराक बरी साथ दिली. तांचे मदीं शेंकड्याची भागिदारी जाली. बटलरान 32 बॉलांनी अर्द शेंकडो पुर्ण केलो. ते उपरांत ताणें लेगीत ताणें आक्रमक बॅटींग चालूच दवरली. ताका लागून गुजराताची जैताची आस्त वाडली. जैता खातीर 8 बॉलांनी 11 धांवड्यांची गरज आसतना रुदरफोर्ड 34 बॉलांनी 43 धांवड्यो करून बाद जालो.
अखेरचे ओव्हरींत जैता खातीर 10 धांवड्यांची गरज आशिल्ली. त्या वेळार बटलर 97 धांवड्यांचेर दुसरे वटेन उबो आशिल्लो. स्ट्रायकाचेर आशिल्ल्या राहुल तेवतियान पयल्याच बॉलाचेर सको मारलो आनी दुसऱ्या बॉलाचेर चवको मारलो. अशे तरेन गुजरात जिखलो. पूण, बटलराक शेंकडो चुकलो. दिल्ली वतीन मुकेश कुमार आनी कुलदीप यादव हांकां एकेक विकेट फावो जाली.
ते पयलीं गुजरात टायटन्सान टॉस जिखून पयलीं फिल्डींग करपाचो निर्णय घेतलो. दिल्लीन 20 ओव्हरींनी 8 बाद 203 धांवड्यो केल्यो. दिल्ली वतीन मुखेली अक्षर पटेलान 32 बॉलांनी 39 धांवड्यो केल्यो. आशुतोष शर्मान 19 बॉलांनी 37 धांवड्यो केल्यो. तशेंच ट्रिस्टन स्टब्सान 21 बॉलांनी 31, करुण नायरान 18 बॉलांनी 31 आनी लोकेश राहुलान 14 बॉलांनी 28 धांवड्यो केल्यो.
गुजराता वतीन प्रसिद्ध कृष्णान 4 विकेटी घेतल्यो. साई किशोर, इशांत शर्मा, अर्शद खान आनी मोहम्मद सिराज हांकां एकेक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
