भांगरभूंय | प्रतिनिधी
पांच जाणां आड गुन्यांव नोंद
अहमदाबाद, खबरां संस्था : बनावट कागदपत्रां आनी पुरावे सादर करून सरकाराक तोपी घालपाच्यो जायत्यो घडणुको घडटात. पूण आतां बनावट ‘टोल प्लाझा’ उबारून सरकाराकूच शेंडी लावपाचें धक्को दिवपी प्रकरण उजवाडाक आयलां. ही घडणूक गुजरातांत घडल्या. सुमार देड वर्सां उपरांत हें उजवाडांत आयलां. एनडीटीव्हीन हे विशीं खबर दिल्या.
गुजरातांतल्या बामनबोर- कच्छ राष्ट्रीय म्हामार्गाचेर खाजगी जमनीचेर बनावट टोल प्लाझा उबो केला. महामार्गाचेर टोल घेतात, पूण कांय बळिश्ट लोकांनी येरादारी हो बोगस टोल प्लाझा आशिल्ल्या रस्त्याचेर येरादारी वळोवन सरकारी अधिकाऱ्यांक एक वर्स फटयले. गुजरातांतल्या मोरबी शारांत राष्ट्रीय म्हामार्गा कुशीक खाजगी जमनीचेर हो प्लाझा उबारला. लोकां कडल्यान टोल बुथाचेर अर्दी तिकेट घेवन, भौस, पुलीस आनी उंचेल्या पांवड्यावेल्या सरकारी अधिकाऱ्यांक देड वर्सां फटोवपाचो हो प्रकार घडला.
राष्ट्रीय म्हामार्गाचो अधिकृत टोल आशिल्ल्या वाघसिया टोल प्लाझाच्या वेवस्थापकान सांगलें, ‘खाजगी जमनीचे धनी देड वर्सां सावन दर दिसा हजारांनी रुपयांची उक्तेपणान फटवणूक करतात. व्हाइट हाऊस सिरॅमिक कंपनीच्या जमनींतल्यान, बंद कारखानो आनी वाघसिया गांवांतल्यान मुखेल रस्त्या वयली येरादारी वळोवन तांणी हो गैरप्रकार केलो.’
वाहन चालक खोशी
अर्द्या टोल कराक लागून ट्रक चालकांक हो मार्ग आपणावपाक प्रवृत्त केले. ते खोशयेन हें वटेनच्यानूच येताले. ह्या बेकायदेशीर कर वसुली कडेन कोणाचेंच लक्ष गेलें ना. वाघसिया टोल प्लाझा मार्गांतल्यान कांय वाहनां वळोवन टोल कर वसुली करपाची म्हायती आमकां मेळ्ळी. पुलिस आनी हेर अधिकारी ह्या प्रकरणाची चवकशी करपाक थंय पावले तेन्ना तांकां हे विशीं सविस्तर म्हायती मेळ्ळी. देखून पुलिसांनी कागाळ केल्या, अशें मोरबीचे कलेक्टर जी टी पांड्या हांणी सांगलें.
अमरशी पटेल, वनराज सिंग झाला, हरविजय सिंग झाला, धर्मेंद्र सिंग झाला, युवराज सिंग झाला आनी व्हाइट हाऊस सिरॅमिक कंपनीच्या अज्ञात व्यक्तीं आड पुलिसांनी कागाळ नोंद केल्या. तांची हांगां दादागिरीय चलताली अशें अधिकाऱ्यांनी सांगलें.
केस नोंद जाल्ले कितें म्हणटात
वांकनेर शारा लागसार एनएच 8 एचेर एनएचएआयच्या वाघसिया टोल प्लाझाच्या पूर्वेक आशिल्लो व्हाइट हाऊस टायल्स प्रायव्हेट लिमिटेड (डब्ल्यूएचटीपीएल) हो सिरॅमिक टायल्स तयार करपी कारखानो ताच्या कुटुंबाचो, अशें अमरशी पटेल हांणी राजकोटांत मिडियाक सांगलें. ताणें हो कारखानो एका मनशाक भाड्यान दिला.
मजगतीं, फायनान्शियल एक्सप्रेसाच्या अहवाला प्रमाण, एक दुबावीत, वाघसिया गांवचो सरपंच धर्मेंद्र सिंग हो भाजपाची सत्ता आशिल्ल्या वांकनेर तालुका पंचायतीची आदली सरपंच रियाबा झाला हिचो घोव.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
