गुजरातांत समान नागरी कायदो लागू जावये

भांगरभूंय | प्रतिनिधी

-वेंचणूक जाहीर जावपा पयलीं व्हड खेळी

गांधीनगर : गुजरातांतल्या सत्ताधारी भाजपान राज्यांतली विधानसभा वेंचणूक जाहीर जावपा पयलीं व्हड खेळी खेळ्ळ्यां. गुजरांत सरकाराची काल कॅबिनेट बसका जाली. हे बसकेंत समान नागरी कायदो लागू करपा विशीं एक समिती स्थापन करपाच्या प्रस्तावाक मंजुरी दिल्या.

समिती स्थापन करपाचे अधिकार मुख्यमंत्री भूपेंद्र पटेल हांकां दिल्यात. पटेल जी समिती स्थापन करतले ती समिती समान नागरी कायदो लागू करपा विशींच्या शक्यतायेची तपासणी करतले. हे खातीर विवीध मुद्यांचो अभ्यास करतले. उच्च न्यायालयाच्या निवृत्त न्यायमूर्तींच्या अध्यक्षते खाला समिती स्थापन जातली.

गुजरातचे मुख्यमंत्री भूपेंद्र पटेल हांणी ट्विट करून राज्यांत समान नागरी कायदो लागू करपा विशींची शक्यताय आशिल्ल्याचे सांगलें. ताचो ड्राफ्ट तयार करपाक सर्वोच्च न्यायालय वा उच्च न्यायालयाच्या न्याधाधिशांचे अध्यक्षते खाला वयल्या पांवड्या वयली समिती स्थापन करपाचो निर्णय घेतिल्ल्याचे तांणी सांगलें. राज्य मंत्रीमंडळाचे बसकेंत हो म्हत्वाचो निर्णय घेतला, अशें तांणी म्हणलें.

उत्तराखंडांत वेंचणूक जावपा पयलीं समान नागरी कायदो लागू करपा विशीं आस्वासन दिल्लें. उत्तराखंडांत भाजपा सरकार आयलें उपरांत समान नागरी कायदो लागू केलो. गुजरातांत वेंचणूक 1 वा 2 नोव्हेंबराक जाहीर जावपाची शक्यताय आसा. ताचे पयलीच भाजपा कडल्यान समान नागरी कायद्या विशीं व्हड खेळी खेळिल्ल्याचे दिसून येता.

समान नागरी कायदाे कितें

समान नागरी कायद्या प्रमाण लग्न, घटस्फोट, भुरग्यांक दत्तक घेवप, संपत्तीचें वांटप हे खातीर सगल्या नागरिकां खातीर एकच कायदो, एकच नेम लागू जाता. भारतांत रावपी दरेक व्यक्तीक हो नेम लागू आसतलो. ती व्यक्ती खंयचोय धर्म वा जातीची आसली तरी तिचे खातीर हो कायदो लागू जातलो. ज्या राज्यांत समान नागरी कायदो लागू जाता थंय लग्न, घटस्फोट, जमीन, संपत्ती हांच्या वांटपा खातीर एक कायदो लागू जाता.