भांगरभूंय | प्रतिनिधी
एका काळार पणजे लागसारच्या उपनगरांनी सांजचे साता उपरांत फिरप धोक्याचें मानताले. कारण थंय खंडणी घेवप, दादागिरी करप, गँग वाॅर असले प्रकार चलताले. उपरांत ही कीड कांय दर्यावेळांचेर पावली. थंय तर ‘डायरेक्ट सर्गार’ प्रकार पसून जाल्यात. ही तवनास तरणाट्यांचीं कर्तुबां कांय वर्सां चल्लीं, उपरांत तांकां बुद्द आयली आसतली. तातूंतले कांय जाण राजकारणांत पसून पावले. वाल्या कोळ्याचे वाल्मिकी जाले. रवी नायक मुख्यमंत्री आशिल्ले तेन्ना तांणी विशिश्ट कायद्यांचो वापर करून कांय गुंड, मवाल्यांक आग्वाद आनी हेर बंदखणींनी बंद केल्ले. आतां मुख्यमंत्री डाॅ. प्रमोद सावंत हांणी तीच धिटाय दाखोवन राज्यांतली शांतताय इबाडपी तरणाट्यांच्या नांकांत दावें घालपाचो वेळ आयला. पयर कोलव्यां सर्कला कडेन मध्यानरातीं जें कितें जालें, तें गोंयकारां मदीं (खास करून नवी पिळगी) भिरांत पातळावपी आसा. कारण तांणी हालींच्या तेंपार गोंयांत अशें केन्ना जाल्लें आयकूंक ना आसतलें. आतां तांकां तें सोशल मिडियाचेर पळोवपाकूय मेळ्ळें.
स जाणांनी एकल्याचेर आदलो राग काडलो. अटक जाल्या ते सगलेच गुंड, अशें पुलिसांचें म्हणणें. म्हणजें हें गँगवाॅर जालें. पुलीस तांकां ख्यास्त जावची हे खातीर कशे तरेन पुरावे एकठांय करतात काय राजकी फुडाऱ्यांच्या आशिर्वादान ते सुट्टात, तें कळटलें. व्हिडियोक लागून हो प्रकार कळ्ळो. नाजाल्यार तो पचपाचो.
राज्यांतली कायदो आनी सुवेवस्था सामकी बरी आसा असो व्हडलो आवाज फाटीं जातालो. ती इबाडल्या, असोय हय, न्हयसो आवाज येतालो. मात कोलव्यां जें कितें जालें, तें भयानक म्हणपाचें. असले प्रकार गोंयांत चड जावंक नात…. ताचो व्हिडियो स दुबावितां मदल्या कोणेतरी काडला आसतलो. सोशल मिडियाचेर तो व्हायरल जावपाक वेळ लागूंक ना. मारामारी, दुर्घटना, अपघात, केस्तावांचे व्हिडियो खिणा भितर व्हायरल जातात. लोकां मदीं दहशत, भिरांत पातळावपाक तो काडिल्लो, अशें दिसता. कारण असले व्हिडियो तिसरो मनीस काडटा. मारपेट करपीच सहसा ते काडिनात. हाचे वयल्यान त्या गुंडांची मानसिकताय, मद कळटा. हे सगले विशी- पंचविशींतले!! तरणाटे पिळगेंतले कांय जाण खंयचे दिकेन वचपाक लागल्यात, ताचेर दोन दिसां पयलीं ह्याच स्तंभांत बरयिल्लें. तांकां जाग्यार हाडटलो जाल्यार कितें करपाक मेळटलें, हाचो विचार तांच्या पालकांनी, शिक्षकांनी, सरकारी यंत्रणांनी, मानसोपचार तज्ञांनी करपाक जाय.
ही मारपेटाची घडणूक रातीं अडेच वरांचेर घडल्या. म्हणजे हे तरणाटे रातभर हेडटात? …. आनी पुलिसांक तांकां हटकुपाचें अशें दिसना? खरें तर रातीं एक- देडा उपरांत रस्त्यार दिसपी लोकांचें वळखपत्र तपासपाक जाय. दुबाव आयल्यार चवकशी करपाक जाय. जंय गुन्यांव घडपाची चड शक्यताय आसा, थंय पुलिसांनी चड बारीकसाण दवरूंक जाय. सेटर ओडून बार्रां फांतोडेर मेरेन चालू आसतात. तांकां कायदो लागना? टायट जाल्यार गाडयेन घरा पावोवपाची ती ‘सिली स्कीम’ केल्ली, तिचें कितें जालें? गोंय पर्यटन राज्य म्हणटकच कोणाकूय कितेंय करपाची मेकळीक आसा? दर्यावेळांचेर चलयांचे खून जाल्यात. साळगांवां फाटीं मध्यानरातीं एकल्याक सुरो तोंपिल्लो. ड्रग्सांचें तर विचारपाचें ना. सद्दां कोण ना कोण तरी मेळटाच. पुलीस अधीक्षक निधीन वाल्सन हांच्या मतान, म्हयन्याक उणेच 45 कील ड्रग्स धरतात. म्हणजे दिसाक लाखभर मोलाचीं घुंवळे वखदां जालीं. तातूंत खूब गोंयकार घुस्पल्यात, असोय तांचो दावो. रातचे हेडपी तरणाटे आनी घुंवळे वखदांचो वेव्हार हे नदरेनूय तपास करूंक फावो.
कांय राजकी फुडारी तरणाट्यांक पोसतात. तांचे कडल्यान बेकायदेशीर कामां करून घेतात. सिनेमांत सगल्यांनी हें पळयलांच आसतलें. समाजाचें प्रतिबिंब सिनेमांनी दिसता. म्हणटकच वेगळें कितें सांगपाक नाका. गुंडगिरी करपी तरणाट्यांक पुलिसांनी धरून व्हेले काय उणेच दोग फुडारी तांकां सोडोवपाचो यत्न करतात. फुडारी म्हणजे राज्य ते गांव पांवड्या वयले. सगले! तशें जावंक फावना.
साक्षरतेचे बाबतींत गोंय केरळा फाटोफाट आसा. निदान हाचे फुडली पिळगी इझी मनी फाटल्यान धांवची ना. वायट मार्गार वच्ची ना, हें पळोवप आमची सगल्यांची लागणूक. योग्य शिक्षण आनी रोजगार मेळत जाल्यार तरणाटे गुंडगिरी आपणावचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
