भांगरभूंय | प्रतिनिधी
गोंयांत ल्हान भुरग्यांच्या भलायकेच्यो गंभीर समस्या
पणजी : ल्हान भुरग्यांच्या खावपा पिवपाचे पद्दतीन जाल्लो बदल आनी जल्माक आयले उपरांत गरजेचें आवयचें दूद मेळनाशिल्ल्यान गोंयांत गिड्डेंपण, उणें वजन, अशक्तपणा सयत कुपोशणाचीय गंभीर समस्या निर्माण जाल्या. सध्याचे परिस्थितींत गोंयांत 25 भुरगीं कुपोशीत आसून तांचे भलायकेंत सुदारणा घडोवन हाडपाक भलायकी तशेंच बायलां आनी भुरगीं उदरगत खात्या कडल्यान यत्न सुरू आसात.
भलायकी क्षेत्राचेर सगल्यांत चड निधी खर्च करपांत गोंय देशभरांत अव्वल सुवातेर आशिल्ल्याचे निती आयोगान आपल्या अहवालांत स्पश्ट केलां. पूण फाटल्या कांय वर्सां पसून गोंयांत ल्हान भुरग्यां मदलें गिड्डेंपण, उणें वजन तशेंच अशक्तपणांत वाड जायत आशिल्ल्याचे आयोगान अहवालांत नमूद केलां. हे विशीं राज्य कुटुंब कल्याण विभागाचे मुख्य वैजकी अधिकारी डॉ. राजेंद्र बोरकार हांचे कडेन संपर्क केलो, तेन्ना तांणी ल्हान भुरग्यांचे खावपाचे पद्दतीन जाल्ले बदल, जंक फूडचे वाडटें प्रमाण आनी जल्माक आयले उपरांत दोन वर्सां मेरेन आवयचें दूद मेळनाशिल्ल्याचे कारणांक लागून राज्यांत ह्यो समस्या निर्माण जायत आसात. ह्याच कारणांक लागून राज्यांत सद्याचे स्थितींत 25 भुरगीं कुपोशीत आशिल्ल्याचे दिसून आयलां. तांच्या पोशणा खातीर सरकारा कडल्यान यत्न जातात, अशें तांणी सांगलें.
पयलींच्या काळांत ल्हान भुरग्यांक जे परंपरीक अन्न दिताले, तातूंतल्यान तांकां फावोशे लाेह, प्रथिनां मेळटालीं. पूण काळ जसो बदलता तसो गोंयांत पाश्चिमात्य संस्कृती स्विकारपाक सुरवात जाल्या. अशा कुटुंबांनी परंपरीक खावपा पदार्था बदला जंक फूडाक प्राधान्य दितात. ते भायर भुरगें जल्माक आयले उपरांत ताका सुरवातीचे स म्हयने आवयचें दूद मेळप गरजेचें. ते उपरांत फुडली दोन वर्सा आवयच्या दूदा सयत हेर पुश्टीक पदार्थ मेळप गरजेचें. पूण गोंयांतल्यो कांय आवयो विवीध कारणांक लागून भुरग्यांक स्वताचें दूद दिनात. भुरग्यांक लोह, प्रथिनां आशिल्लें अन्न दिनात. ताचोच फटको भुरग्यांक पिराय वाडले उपरांत बसता, अशें डॉ. बोरकार हांणी म्हणलें.
………………
सरकारा कडल्यान पालकांचेय प्रबोधन
ल्हान भुरग्यांची उंची, वजन वाडपाक, ती सशक्त जावपाक केंद्र सरकारान विवीध कार्यावळींच्या माध्यमांतल्यान भुरग्यां सयत तांच्या आवय-बापायचें प्रबोधन करपाक सुरवात केल्या. हे कार्यावळी खाला आंगणवाडयांच्या माध्यमांतल्यान भुरग्यांक आनी माध्यान्ह आहाराच्या माध्यमांतल्यान शालेय भुरग्यांक पुश्टीक अन्न दितात, अशें डॉ. राजेंद्र बोरकार हांणी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
