भांगरभूंय | प्रतिनिधी
मुख्यमंत्रीः गोंयचे मातयेचो वापर हो गोंयकारां खातीर अभिमान
पणजी : गोंयच्या संस्कृतायेचें नव्या संसद भवनांत दर्शन घडटलें अशें मुख्यमंत्री डॉ. प्रमोद सावंत हांणी सांगलें. मुख्यमंत्र्या हस्तुकीं गोंयच्या मातयेच्या पुजन सुवाळ्यांत ते उलयताले. संसद भवन बांदकामा खातीर गोंयच्या ज्या मातयेचें भुमिपुजन जातलें, तिचें भुमीपुजन मुख्यमंत्र्यां हस्तुकीं जालें.
ह्या सुवाळ्याक कला आनी संस्कृती खात्याचे मंत्री गोविंद गावडे, समाज कल्याण खात्याचे मंत्री सुभाष फळदेसाय, मंत्री निळकंठ हळर्णकार हाजीर आशिल्ले. ते भायर आमदार डॉ. चंद्रकांत शेट्ये, गणेश गांवकार, जीत आरोलकार, जेनिफर मोंसेरात, पणजीचे म्हापौर रोहीत मोन्सेरात, कला आनी संस्कृताय खात्याचे संचालक सगुण वेळीप हाजीर आशिल्ले.
नव्या संसद भवनाचो बुन्यादी फातर प्रधानमंत्री नरेंद्र मोदी हांणी घाला. संसद भवना खातीर सगल्या राज्यांतल्या मातयेचो वापर जातलो. गोंया सावन जी माती संसद भवना खातीर वतली, त्या मातयेचें भुमीपुजन मुख्यमंत्र्या हस्तुकी ह्या कार्यावळींत जालें. ह्या वेळार नव्या संसद भवन इमारतीची म्हायती दिवपी चित्रफीत दाखयली. सद्याच्या संसद भवना मुखा वेले सुवातेर नवी इमारत जातली. 64500 चौखण मिटर सुवातेचेर बांदकाम जातलें. 31 म्हयन्यांत इमारत पुराय करपाचे उद्दिश्ट आसा. इमारतीचें बांदकाम इको फ्रेंडली पद्दतीन जातलें. फुडली 150 वर्सां इमारत तग धरतली अशे तरेन बांदकाम जातलें. भुंयकांप जालो तरी इमारतीक लुकसाण जावचें ना अशे तरेन बांदकाम जातलें. संविधान सभाघर, समिती कक्ष, भाेजन कक्ष, ग्रंथालय ह्यो सगल्यो सुविधा नव्या इमारतींत आसतल्यो. लोकसभा सभाघरांत 888, राज्यसभेंत 384 तशेंच जोड सभाघरांत 1272 आसन वेवस्थेची तांक आसतली. राज्यसभा सभाघराचो आकार कमळा सारको जाल्यार लोकसभेचो मोरा सारको आसतलो.
प्रधानमंत्री नरेंद्र मोदी हे अंत्योदय तत्वाचेर वावर करतात. राम मंदिराची उबारणी, 370 कलम रद्द करपाचो निर्णय, स्टार्ट अप इंडिया अशें क्रांतिकारी निर्णय प्रधानमंत्री मोदी हांणी घेतल्यात. देशांत स्वच्छता अभियान राबयतना प्रधानमंत्र्यांनी स्वता सान्न हातांत घेतली. फुलकार, नुस्तेकार, शेतकार हांणी केन्ना बँकेची इमारत पळोवंक नाशिल्ली. जन धन येवजणेच्या आदारान 25 कोटी लोकांक बँके कडेन जोडले. आयुशमान भारत येवजणे खाला 5 लाख नव्यो विमा येवजण्यो जाल्यो. संसद ही एक देशाची पवित्र वास्तू. नव्या इमारती खातीर सगल्या राज्यांतल्या मातीचो वापर जातलो. गोंयच्या मातयेचो वापर जावप ही गोंयकारां खातीर अभिमानाची गजाल आसा, अशें मुख्यमंत्री डॉ. प्रमोद सावंत हांणी सांगलें.
कला आनी संस्कृती खात्याचे मंत्री गोविंद गावडे हांणी येवकाराचें उलोवप केलें. गोंयची भूंय ही पवित्र भूंय आसा. ह्या पवित्र भुंये मदल्या मातयेचो वापर संसद भवना खातीर जाता, ही अभिमानाची गजाल अशें गावडे हांणी म्हणले. मंत्री सुभाष फळदेसाय हांणी उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
