भांगरभूंय | प्रतिनिधी
पणजी : शास्त्रीय संगीत तशेंच नाट्यगीत गायक, अभिनेते पं. प्रभाकर जनार्दन कारेकार (80) बुधवारा रातीं संवसाराक अंतरले. तांची कूड बिरेस्तारा सकाळीं निमाणे दर्शन करपा खातीर मुंबय शिवाजी पार्कांतल्या तांच्या घरा दवरतले. सांजवेळा 5 वरांचेर दादर शिवाजी पार्कांतल्या मसणभुंयेंत तांचे कुडीचेर निमाणे संस्कार करतले. तांच्या फाटल्यान तीन चले, सुनो, नातरां असो परिवार आसा. 2022 वर्सा सावन तांकां यकृताचे दुयेंस आशिल्ले.
पं. कारेकार हांचो जल्म 4 जुलय 1944 वर्सा माशेलांत जालो. तांचें शालेय शिक्षण मडगांवां न्यू इरा हायस्कूलांत जालें. पिरायेच्या बाराव्या वर्सा ते गायन शिकपाक मुंबय आयले. उपरांत ते पं. जितेंद्र अभिषेकी हांचे कडेन गायन शिकलें. पं. कारेकार हांणी चडशे शास्त्रीय गायन केलां. मराठी नाट्यगितां, हिंदी पदांय गायल्यांत. बोलावा विठ्ठल पाहावा विठ्ठल, वक्रतुंड महाकाय अशीं नामनेचीं गितां तांच्या नांवान आसात. गायक आनी बरे शिक्षक म्हणून तांची नामना आशिल्ली. ऑल इंडिया रेडिओ आनी दूरदर्शना खातीर तांणी जायत्यो कार्यावळी केल्ल्यो आनी ह्या माध्यमांचेर ते लोकप्रीय कलाकार आशिल्ले.
कोंकणी पदां
तांणी मुंबय आकाशवाणीच्या कोंकणी विभागांत पं. जितेंद्र अभिषेकी मुखेली आसतना आनी उपरांत जायतीं कोंकणी पदां गायल्यांत. गोंयचें नांव व्हड करूंक ल्हान जालें म्हान… (बाकीबाब), सृश्ट तूं कमळ कशी दीत राव सुवास, रावलां जावन पराग हांव तुजे कुशींत हांव… (हरदत्त खांडेपारकार).. हीं पदां गाजल्यांत. तांकां संगीत पं. जितेंद्र अभिषेकी हांणी दिलां.
फ्युजन संगीत
कारेकार हांणी ऑर्नेट कोलमैन (यूएसए) आनी सुलतान खान (भारत) हांचे वांगडा फ्युजन संगिताच्या संवसारांत प्रवेश केलो. हिंदुस्तानी गायन संगितांत तांणी दिल्ल्या योगदाना खातीर तांकां संगीत नाटक अकादेमीचो पुरस्कार फावो जालो. कारेकार हांकां 2014 वर्सा मध्यप्रदेश सरकाराचो तानसेन सम्मान आनी 2016 वर्सा संगीत नाटक अकादेमी पुरस्कार फावो जाल्ले. गोमंतभूषण पुरस्कारूय तांकां मेळिल्लो.
पं. कारेकार हे स्वरप्रभा ट्रस्टाचेय संस्थापक आनी अध्यक्ष आशिल्ले. तांणी जायत्या कुशळ तरणाट्या संगितकारांक प्रशिक्षण दिलां. तांची जायतीं रेकॉर्डिंगां आसात आनी तांणी जायत्या देशांनी सादरीकरण केलां, व्याख्यानां दिल्यांत आनी कार्यशाळा घडोवन हाडल्यात. सम्राट संगीत महोत्सवाचो ते मुखेल आदार आशिल्ले. 1998 त तांणी म्हापश्यां अंजनीबाई मालपेकार हांच्या नांवान सुरू जाल्ल्या आविष्कार संगीत महोत्सवाचें सुरवातीच्या काळांत नियोजन केल्लें.
तांचीं गाजिल्लीं कांय गितां
बोलावा विठ्ठल पहावा विठ्ठल, दे हाता या शरणागता, दीनाची माऊली, कर हा करी धरिला शुभांगी, मर्मबंधातली ठेव ही, धन्य आनंद दिन, घेई घेई माझे वाचे, चंद्रिका ही जणुं, हा नाद सोड सोड, ही बहू चपळ वारांगना, जैसी गंगा वाहे, केधवा पाहिन चरण पांडुरंगा, तुझ्या पंखा वरूनी, कुटिल हेतू तुझा फसला, तेचि पुरुष दैवाचे, दे हाता या शरणागता, दिनांची माऊली.
धन्य आनंददिन पूर्ण मम, धवल लौकिका, नभ मेघांनीं आक्रमिलें, प्रिये पहा रात्रींचा समय सरुनि, प्रेम सेवाशरण, बहुत दिन नच भेटलों, भालीं चंद्र असे धरिला, मधु मीलनांत या, माता वचन दे सदा देशा, नव नवल नयनोत्सवा, रवि मी हा चंद्र कसा, राधाधर मधुमिलिंद जयजय, विमल अधर निकटी, शत जन्म शोधितांना, सुकांत चंद्रानना पातली, सुखानें रमाया जरि, सुरसुखखनि तूं विमला, हर्षली अयोध्या नगरी, हा नाद सोड सोड. पं. कारेकार हांच्या मरणा विशीं मुख्यमंत्री डॉ. प्रमोद सावंत हांणी दुख्ख उक्तायलां. तशेंच कला आनी संस्कृती मंत्री आनी कला अकादमीचे अध्यक्ष गोविंद गावडे हांणीय दुख्ख उक्तायलां. पं. कारेकार हांणी आपलें पुराय जिवीत संगीत कले खातीर ओंपिल्लें. संगीत मळार जायते प्रतिश्ठीत पुरस्कार आनी भोवमान मेळोवन तांणी गोंयची संगीत मळार प्रतिश्ठा हाडिल्ली अशेंय मंत्री गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
