गाडयो, रस्ते, अपघात, कायदे आनी आमी

भांगरभूंय | प्रतिनिधी

गोयांत भौशिक येरादारी वेवस्था बरी नाशिल्ल्यान चडशे लोक स्वताची गाडी वा टू व्हीलर वापरतात. तेच खातीर गोंयांत आमकां दरेका घरांत एक वा दोन गाडयो दिश्टी पडटाच. कांय- कांय घरांनी जितले लोक तितलीं वा त्याय परस चड वाहनां. हालींसरा सतत अपघात जाल्ल्यान, रस्ते खराब जाल्ल्यान आनी सोरो पिवन प्रमाणा भायर स्पीडीन गाडी चलयिल्ल्यान हो विशय मात्सो गंभीर जाल्ल्याचें दिसता.
एक गजाल म्हाका सदांच अचंबीत करता, ती म्हणजे गाडयेची स्पीड कितली आसची? सादी ल्हान गाडी घेतली जाल्यार आनी ताचो स्पीडोमिटर पळयलो जाल्यार चडान चड स्पीड 180 किमी आशिल्ली दिसता. व्हडल्या वाहनांची आनीकूय चड आसता. ह्या ल्हान चारचाकी वाहनांची स्पीड 180 किमी दवरपा फाटलें कारण कितें आसूं येता काय? ही ल्हान गाडी जर शंभराच्या स्पीडीन धावूंक लागली जाल्यार ती सगलींच थरथरता. वाऱ्यान हुबून वचत म्हणून भंय दिसता. जी स्पीड वापरूंक मेळना वा वापरत जाल्यार चलोवप्याचो गाडये वयलो ताबो सुटूं येता, ती स्पीड दिवपच कित्याक? हाचेर विचार कित्याक जायना? आनी इतली स्पीड जर दिल्या जाल्यार ती वापरून पळोवपाक आजचो अतीउत्साही, जिवार उदार जाल्लो तरणाटो तयार जालो, जाल्यार चूक कोणाची?
हालींसरा नव्या गाडयांक एचआयडी, शेनाॅन अश्यो पावरफूल धव्यो हेड लायट्स येतात. कांय जाण त्यो आनीकूय पावरफूल करून बसयतात. ते दिवे इतले कडक आसता की फुडल्यान येवपी दिपकावपाची शक्यता आसता. असल्यो लायटी योग्य काय? हाचेर विचार जाला?
सरकारान फाटीं जाहीर केल्लें की वाहनांचे हारशे डार्क आसचे न्ही. कायद्यान अश्या वाहनांचेर कारवाय जावूंक जाय आशिल्ली. हो कायदो कोण पाळटात काय? जो कायदो पाळपाचोच ना किंवा तो पाळना जाल्यार कारवाय जायना तो कायदो जायच कित्याक? काळो हारसो आशिल्ल्यो गाडयो चड करून पयशेकारांच्यो आसतात. तांचेर कारवाय करप पुलिसांक शक्य जायना काय? वाहनांची नंबर पट्टी स्टॅण्डर्ड आसची म्हणून सवाय भितर ती बदलपाक आरटीओंत एक स्वतंत्र काउंटर उक्तो केला. सामके कमी पयशे भरून नंबर पट्टी बदलूं येता. चडान चड आठ दिसां भितर आनी सहजपणान ही नंबर पट्टी बदलून मेळटा. अजून जाणीं ती बदलूंक ना तांकां तालांव कित्याक पडना? सरकारी वाहनां सुद्दां हाका आडवाद ना. जर लोक सरकारान केल्लो कायदो पाळना आनी तांकां ख्यास्त जायना, जाल्यार तो कायदो बदलप वा रद्द करप योग्य.
हालीं एक नवी फॅशन आयल्या, नंबर प्लेट लावप ना, फुडें लायली जाल्यार फाटल्यान लावप ना, दिसा उजवाडा हेड लाइट चालू दवरप आनी काळोख पडपा वेळार बंद करप, सायड लायट दिनासतना वळप. हाचेर कारवाय जायना म्हणून कायदो मोडप्यांचें फावता.
इश्कोलाचो गणवेश हो हायर सेकंडरी मेरेन घालप गरजेचो. बारावी शिकपी भुरगो हो सादारणपणान अठरा वर्सां सकयल्लो आसता. म्हणजेच इश्कोलाचो युनिफोर्म घालून वाहन चलोवपी भुरग्या कडेन लायसन्स आसप शक्य ना. तरी आसतना हो भुरगो दोन चाकी घेवन येता, वाहन रफ चलयता. इतलेंच न्ही जाल्यार एका दोन चाकीचेर तीग जाण बसतात आनी कायदो कांयच करीना, हें समा न्ही. पुलीस फाटीं लागत म्हणून हे भुरगे स्कूटरी दोफरायतात. व्हडलो आवाज करपी बुलेटी वापरपाचें प्रमाण हालीं खूबच वाडलां. माॅडिफाय दोन चाकी आनी प्रचंड मोटो आवाज करपी हेर वाहनांय प्रमाणा भायर धाविल्लीं दिश्टी पडटात.
शिरस्त्राण (हॅल्मेट) घालना जाल्यार दोन चाकी वाल्यांक आनी बेल्ट घालना जाल्यार चार चाकीं वाल्यांक शारांत तरी तालांव मारतात. आता आनीक एक नवो प्रकार सुरू जाला. तो म्हणजे गाडी (दोन आनी चार चाकी) चलयता आसतना मोबायलाचेर उलोवप. सर्रासपणान हें चालू आसा. कितलेशेच जाण एका हातान स्कूटी आनी दुसऱ्या हातांत मोबायलाचेर उलयत वतना दिसतात. चार चाकी वाहानां चलोवपी कांय जाण गाडी चालू केली काय कानाक फोन लायतात तो बद्द आॅफिसांत पावतकच कानाक थाकाय दिता. म्हाका हो प्रकार ओल्ड गोवा ते पणजे बाय- पासाचेर हमखास दिश्टी पडटा. ते खातीर चलपी गाडी स्लो जाताच आनी ट्रॅफिकय स्लो जाता. फाटलो गाडयेकार हॉर्न मारता हाचें ताका पडिल्ले नासता. हालीं तर गाडी वा टु व्हीलर चलयता आसतना ई- मेल चेक करप, व्हाॅट्सअॅप रिप्लाय करप, मॅसेज धाडप हें सुद्दां सुरू जालां. कार्यालयीन काम गाडी चलयता आसतना सुरू करपाचे उद्येग कांय जाण करतात. ह्या मोबायलाच्या प्रकाराचेर दंड दिवप सुरू जाल्ले ना, अशें म्हणचें पडता.
हालीं जंय अपघात जाल्यात थंय मोबायल कारणीभूत आसूं येता. आपलो खांदो आनी कान हांच्या मदीं मोबायल चेपून, मान वाकडी करून स्कूटरी आनी गाडयो चलोवपी म्हाभाग जळींमळीं दिश्टी पडटात. ह्या असल्या लोकांक आतांच कायद्यान जाग्यार हाडलेंं नात जाल्यार परिस्थिती हाता भायर वचपाक वेळ लागचो ना. खरें म्हटल्यार, चलून रस्तो क्रॉस करता आसतना सुद्दां मोबायल वापरपाक बंदी घालपाचो वेळ लागीं आयला.
फकत कायदे आसले म्हणून जायना, ते पाळचे पडटात आनी पाळना जाल्यार खर कारवाय करची पडटा. पुलिसांक हें जमतलें व्हय?

रघुनाथ साकोर्डेकार
98221 29123