भांगरभूंय | प्रतिनिधी
फोंडें, प्रतिनिधी: गांवकारवाडो – उसगांवां नेमिल्ल्या रस्त्याची दुरुस्ती करून तात्पुरतो हो रस्तो येरादारी खातीर उक्तो केला. ताका लागून फोंडें- वाळपय मार्गावेली येरादारी आदलेवरीं सुरळीत जाल्या. मात दुरुस्ती केल्ल्या सांकवा वेल्यान जड वाहनांक प्रवेश बंद केला.
८ जुलयाक सकाळीं आदलो सांकव नेमिल्ल्यान फोंडें – वाळपय मार्गावेली येरादारी उडीवाड्या वयल्यान वळयिल्ली. उडीवाड्यावेल्या रस्त्याचेर फोंडकुलांचें राज्य जाल्ल्यान वाहन चालकांक बरेच त्रास सोंसचे पडटाले. बांदकाम खात्यान नेमिल्ल्या रस्त्याचेर नवें पायप घालून येरादारी सुरू करपाची तात्पुरती वेवस्था केल्या. ह्या सांकवा वेल्यान येरादारी सुरू केल्ल्यान कांय वाहन चालकांनी समाधान उक्तायलां. मात हांगा नवो सांकव उबारपाची मागणी थळावे करतात.
गावकरवाड्यावेल्या मुखेल रस्त्यावेलो सांवक अचकीत नेमिल्ल्यान हांगच्यान येरादारी पुरायेन बंद केल्ली. ताका लागून फोंडें- वाळपय मागारवेली येरादारी उडीवाड्या वेल्यान वळयल्ली. मात ह्या रस्त्यार सगळ्याक फोंडकुलां पडिल्ल्यान आनी रस्तो अशीर आशिल्ल्यान व्हड वाहनां बंद पडून येरादारी ठप्प जावपाचे प्रकार वाडिल्ले. बांदकाम खात्यान नवो सांकव बांदपाचें काम सुर करून सध्या हांगा तात्पुरती वेवस्था केल्या. रस्त्या सकयल लायटीच्यो सरयो, उदकाचीं पायपां आनी हेर केबल आशिल्ल्यान कामाक आडखळ आयिल्ली. ताका लागून पायप घालून हो रस्तो येरादारीक उक्तो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
