भांगरभूंय | प्रतिनिधी
मडगांव, प्रतिनिधी : गांधी मार्केट फळां-भाजी आनी रेडीमेड गारमेंट वेंडर्स असोसिएशनान मडगांव पालिकेचेर आडखळिल्लीं कामां सुरू करपा खातीर आनी मार्केटा भायर बेकायदो वस्तू विक्री बंद करपा खातीर मोर्चा व्हेलो.
संघटणेन ह्यान पयलीं निवेदन सादर करून मागण्यांचेर १५ दिसां भितर उपाय काडपाची मागणी केल्ली. पालिकेन हाचे कडेन आडनदर केल्ल्यान संघटणेन तिडक उक्तावन मोर्चा काडलो. आदले मंत्री बाबू आजगांवकार, संघटणेचे फुडारी तशेंच आदले नगराध्यक्ष राजेंद्र आजगांवकार हांच्या फुडारपणा खाला हो मोर्चा काडलो.
नगराध्यक्ष आनी मुख्याधिकारी हाजीर नाशिल्ल्यान आंदोलक पालिका इमारतीच्या सोंपणांचेर बसले. उपरांत मुख्याधिकारी आनी नगराध्यक्ष हांचे वांगडा जाल्ले बसकेंत बेकायदेशीर विक्री, चोरबाजार बंद करपाची मागणी केली. गांधी मार्केटांतल्या सोप्याची फी संघटनेच्या वांगड्या कडेन नेमान फारीक करतात. सुमार ८० टक्के जागे बदल्ल्यात. कांय वांगड्यांनी सोप्याचो जागो बदलपा खातीर परवानगी दिवची म्हणून अर्ज केल्यात. पूण आतां मेरेन हाका प्रतिसाद मेळूंक ना. तांकां त्रास करिनासतना जागो बदलचो, तशेंच गांधी मार्केटांतल्या देखभाल दुरुस्तीच्या कामां कडेन लक्ष दिवचें. मडगाव पालिकेन गांधी मार्केटांत शेडी वांगडा ३२ वेवसाय हातगाड्यांत करपाची परवानगी दिल्ल्याक बरींच वर्सां जालीं. पूण आयज मेरेन थंय विजे पुरवण करूंक ना. ही गैर वेवस्था पयस करची, अशी मागणी तांणी केल्या.
पालिके लागसारचे कोमुनिदाद इमारती मुखार आशिल्ल्या पांय पुलाचेर खुबशे विक्रेते बेकायदेशीरपणान रेडीमेड कपडे आनी हेर सामान पालिकेच्या कामाच्या वेळार विकतना दिसतात. ताञचेर कारवाय करची. बेकायदेशीरपणान जावपी विक्रेक लागून गांधी मार्केटांतल्या दुकानदारांच्या वेवसायाचेर परिणाम जाता. आदल्या रेल्वे स्टेशनाचेर दर आयतारा चोर बाजार भरता. ताचेर कारवाय करून तो कायमचो बंद करचो. गांधी मार्केटाच्या भोंवतणी आशिल्लीं गटारां, व्हाळ नितळ करचे. तशेंच ते दुरुस्त करचे अश्यो मागण्यो ह्या वेळार केल्यो.
मार्च म्हयन्यांत आदले मंत्री बाबू आजगांवकार हांणी गांधी मार्केटा भायर जाता ती बेकायदेशीर वस्तू विक्री बंद करची. मार्केटांत कर्नाटक वा हेर राज्यांतली तांबडी भाजी विकची न्हय, जाल्यार गोंयांत पिकयल्लीच भाजी विकची असो उलो मारिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
