भांगरभूंय | प्रतिनिधी
मडगांव: मडगांवच्या गोमन्त कला असोसिएशनान गोंयच्या मुक्ती दिसा निमतान आयोजीत केल्ल्या अखील गोंय आंतरशालेय गट नाच सर्तींत गावडोंगरी, काणकोण हांगच्या तुडल हायस्कुलान सादर केल्ल्या तालगडी ह्या नाचाची पयल्या इनामां खातीर नेमणूक जाली.
दुसर्या इनामा खातीर कळशी नाच सादर केल्ल्या रावणफोंड, मडगांव हांगच्या शिशू विकास हायस्कुलाची नेमणूक जाली. तिसरें इनाम फोंडेंच्या ए जे द आल्मेदा हायस्कुलान सादर केल्ल्या जोगवा ह्या नाचाक फावो जालें. उमेदवाडोवपी इनामां खातीर मडगांवच्या आदर्श वनिता विद्यालय (कुणबी नाच) आनी कुडचडेंच्या न्यू एज्युकेशनल इन्स्टिट्युट हायस्कूल (राजस्थानी नाच) हांची नेमणूक जाली.
ही सर्त कोंब मडगांव हांगच्या श्री दामोदर विद्याभुवन सभाघरांत सोमारा जाली. हे सर्तींत 11 शाळांतल्या सुमार 200 विद्यार्थ्यांनी वांटो घेवन धालो, कुणबी, गुजराथी (गरभा), जोगवा, कळशी, तालगडी, कट्टी अशें गोंयचे आनी भारतीय संस्कृती, परंपरेचें दर्शन घडोवपी नाच सादर केले.
सर्तीच्या इनामां भेटवण कार्यावळीक उद्देजक, गीतकार आनी रोटरी क्लब मडगांवचे अध्यक्ष दिप कारापुरकार मुखेल सोयरे म्हणून हाजीर आशिल्ले. इनामां पुरस्कृत केल्ल्या सुवर्ण लक्ष्मी पतपेढीचे चिटणीस सतीश साळकार मानाचे सोयरे म्हणून हाजीर आशिल्ले.
गोमन्त कला असोसिएशनाचे अध्यक्ष सुभाष लोटलीकार हांणी सगळ्यांक येवकार दिलो. उपाध्यक्ष चंदन नायक हांणी उपकार मानले. सर्त आनी इनामां भेटवण कार्यावळीचें सुत्रसंचालन राजू प्रभुदेसाय आनी राजश्री सुहास नागवेंकार हांणी केलें. सरचिटणीस मंगेश बोरकार हांणी जैतवंतांचीं नांवां सादर केलीं. सर्तीचेे परिक्षक म्हणून डॉ. दिप्ता रुबासुंदरम, गौरव व्यास आनी मुग्धा लोटलीकार हांणी काम पळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
