भांगरभूंय | प्रतिनिधी
रॅस्टोरॅण्ट धनया कडेन बिला वयल्यान वाद
म्हापशें: गटारीची पार्टी आठ पुलिसांक शेकली. सांगोल्ड्यां किसमूर नांवाच्या रॅस्टोरॅण्टांत पार्टी करपी ह्या गटान बिला वयल्यान धनया कडेन वाद घालो. ह्या कारणा वयल्यान पुलीस खात्यान ह्या सगल्यांचेर निलंबनाची कारवाय केली. हातूंत दोन पुलीस सहाय्यक उपनिरिक्षकांचो आस्पाव आसा. राजकारण्याचो हस्तक्षेप थारलो निर्णायक.
निलंबीत केल्ल्या पुलिसां मदीं सहाय्यक उपनिरिक्षक विजय पटेल (वास्को पुलीस स्टेशन), सहाय्यक उपनिरिक्षक सोहन तुळसकार (वायरलेस विभाग), हवालदार वासुदेव कोरगांवकार (एस.बी. विभाग वास्को), चालक कॉन्सटेबल सुनील म्हाळशेकार (कळंगूट पुलीस स्टेशन), कॉन्सटेबल प्रज्योत फडते (फोंडें येरादारी विभाग), कॉन्सटेबल नितेश बोरकार (एस. बी. विभाग पणजी), कॉन्सटेबल प्रणेश फडते (येरादारी विभाग फोंडें) आनी जयेश आगरवाडेकार (येरादारी विभाग वास्को) हांचो आस्पाव आसा.
ही घडणूक मंगळारा रातीं 10 वरांच्या सुमाराक घडली. वयले सगले पुलीस कर्मचारी पार्टी करपा खातीर दोन गाडयांतल्यान पर्वरे सांगोल्डें मजगतच्या चोघम रस्त्या वयल्या किसमूर ह्या रॅस्टोरॅण्टांत पार्टी खातीर आयिल्ले. ह्या कर्मचाऱ्यांनी गटारी अमाशे निमतान ही पार्टी करपाचें थारायलें.
रॅस्टोरॅण्टांत जेवणखाण केले उपरांत हॉटेल कर्मचाऱ्यांनी तांकां बील दिलें. हें बील आठ हजार रुपयांचें आशिल्लें. ह्या बिलाचेर तांणी रॅस्टोरॅण्टाचे धनी प्रशील नेत्रावळकार (सुकूर) हांचे कडेन वाद घातलो आनी तांकां गाळी संवल्यो.
हे विशीं रोखडेंच हॉटेल धनयान साळगांव पुलिसां कडेन संपर्क सादलो आनी घडणुकेची म्हायती दिली. पुलीस घडणूक थळार दाखल जाले आनी तांणी ह्या पुलिसांक ताब्यांत घेतले. रॅस्टोरॅण्ट धनी नेत्रावळकार हांणी हे विशीं पुलीस स्टेशनार लेखी कागाळ दिली. पूण पुलिसांची नोकरी वतली हाची जाण जाल्ल्यान तांणी ही कागाळ नोंद करची न्हय अशी विनंती पुलिसांक केली. ते प्रमाण वयल्या सगल्या निलंबीत पुलिसांक कसलीच कारवाय करिनासतना सोडून दिले.
रॅस्टोरॅण्ट धनयाच्या एका राजकारणी सोयऱ्याक हो प्रकार समजलो. तांणी वरिश्ठ पुलिसांक ही म्हायती दिली आनी कारवायेची मागणी केली. ते प्रमाण वरिश्ठ अधिकाऱ्यांनी संबंदीत पुलिसां विशीं रिपोर्ट सादर करपाचो आदेश दिलो. ह्या रिपोर्टा प्रमाण तांचेर शिस्तभंगाची कारवाय म्हूण सगल्यांक सेवेंतल्यान निलंबीत केले. हो आदेश बुधवारा दनपारां संबंदीत विभागाच्या पुलीस अधिक्षकां वतीन काडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
