भांगरभूंय | प्रतिनिधी
वेतनश्रेणीच्या मुद्याचेरूय रोखडेच घेतले निर्णय
मडगांव : ज्या शिक्षकांक गंभीर दुयेंस (टर्मिनल इलनेस) आसतलें तांकां वैजकी रजा मेळटली. हे विशीं शिक्षण खात्या वतीन रोखडेंच परिपत्रक काडटले. तशेंच वेतनश्रेणी विशीं जे प्रस्न मांडल्यात ते वित्त खात्याच्या अधिकार्यां कडेन चर्चे उपरांत सोडयतले, अशें मुख्यमंत्री डॉ. प्रमोद सावंत हांणी सांगलें.
गोंय उच्च माध्यमीक शिक्षक संघटणा (हिस्टॅग) हांचे वतीन मडगांवच्या रवींद्र भवनांत कलागुरुजन २०२५ हे कार्यावळीचें आयोजन केल्लें. ह्या वेळार डॉ. सावंत हांणी शिक्षकांक मार्गदर्शन करतना वेतनश्रेणी आनी वैजकी रजेच्या विशयाचेर भाशण केलें. हे कार्यावळीक आदले उपमुख्यमंत्री बाबू कवळेकार, शिक्षण सचीव प्रसाद लोलयेंकार, गोविंद पर्वतकार, हिस्टॅग अध्यक्ष बाबाजी सावंत, माध्यमीक आनी उच्च माध्यमीक शिक्षण मंडळ अध्यक्ष भागीरथ शेट्ये, शिक्षण संचालक शैलेश झिंगडे आनी हेर हजर आशिल्ले.
डॉ. सावंत हांणी सांगलें, शिक्षक सदांच भुरग्यांच्या सर्तींची तयारी करतात, मात शिक्षकां खातीर सर्त करपाची संद हे कार्यावळीक लागून मेळ्ळ्या. हाका लागून महाविद्यालयांतल्या यादींचेर उजेड पडला आनी कितेंय तरी नवें शिकोवपाक मेळ्ळें. बाबाजी सावंत हांणी शिक्षकांचे वेतनश्रेणी आनी वैजकी रजेचे प्रस्न मांडले. ज्या शिक्षकांक गंभीर दुयेंस जाल्यार तांक़ां वैजकी रजा मेळचे खातीरचें परिपत्रक शिक्षण सचीव आनी शिक्षण संचालक काडटले. शिक्षकांच्या वेतनश्रेणीच्या विशीं वित्त खात्याच्या अधिकार्यां कडेन चर्चा करुन फुडाराक नक्की घेतले, अशेंय सांगलें. शिक्षकांनी सदांच कितेंय तरी नवें शिकपाची गरज आसा.
एनईपीची सध्याची गरज आनी फुडाराक ताची गरज हे विशीं प्रसाद लोलयेंकार हांणी म्हायती दिल्या. ह्या वेळार तांणी शिक्षकांचो हातूंत वाटो गरजेचो आशिल्ल्याचें स्पश्ट केलें. शिक्षकांक नव्याची पुर्णताय आनी तंत्रज्ञानाची कास धरपाची गरज आसा. केन्नाय वाचून शिकपाक जायना, तें गटचर्चेंतल्यान, सर्तींतल्यान शिकपाक मेळटा. केन्नाय दायजान मेळिल्ली परंपरा विसरुन फकत उदरगतीचो ध्यास घेतात. हाका लागून जायते फावट गोंयचो इतिहास परत वाचिनात. विद्यार्थ्यांचे उदरगतींतल्यान शिक्षकांचें नांव जायत आसता. भुरग्यांच्या करिअरा खातीर शिक्षकांचो व्हड वाटो आसता. उच्च माध्यमीक परीक्षांक राज्यांतल्यान सुमार २० हजार विद्यार्थी आसतात आनी १ हजार शिक्षक तांकां शिकयतात. हाका लागून शिक्षकाक २० भुरग्यांक फुाडार घडोवपाचें काम करपाचें आसता. एका वराच्या तत्वाचेर जे शिक्षक चड जाल्यात, तांकां दुसरे सुवातेर कामाक घेतले. तांकां सेवेंतल्यान काडून काडचे ना. हे विशींचे आदेश शिक्षण सचिवांक दिल्यात, अशें तांणी सांगलें.
भुरग्यांचें करिअर शिक्षकूच थारावपाक शकतात : मुख्यमंत्री
शिक्षक होच भुरग्यां खातीर एक बरो समुपदेशक जावपाक शकता. हे खाती भुरग्यांक फुडाराक कितें करपाचें आसा, हे विशीं उलोवन तांकां करिअरा विशीं म्हायती दिवपाची गरज आसा. भुरग्यांक पद्वी दिवपाचें काम करूंक नाकात, जाल्यार तांची जीण, करिअर घडोवपाचें काम करात. धावी आनी बारावी जाल्ल्या भुरग्यांक आयटीआय, पदवी, पदविका कोर्सा विशीं म्हायती दिवची. भुरग्यांचो फुडार पालक वा सरकार शकनात, जाल्यार ते शिक्षक शकतात. युवा घडले बगर देश घडचो ना. ताका लागून विकसीत भारत, विकसीत गोंय करपाक शिक्षकांचो आसपाव गरजेचो आसा, अशें डॉ. सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
