भांगरभूंय | प्रतिनिधी
पणजी ः खोर्ली- म्हापशें घडिल्ल्या मारपेट प्रकरणांत खंडणी, गुन्यांवकारी हेतून घरात घुसप ह्या आरोपा खाला म्हापशें पुलिसांनी परस्पर विरोधी गुन्यांव दाखल केला.
हो प्रकार सोमार १७ फेब्रुवारीक दनपरां सुमार ३.३० वरांचेर खोर्ले नगरसेवक स्वप्निल शिरोडकार हांच्या घराच्या वाठारांत घडिल्लो. ह्या प्रकरणांत पुलिसांनी विलासिनी विलास शिरोडकार (६९) आनी जवाहर शेट्ये (७५) हांणी कागाळ नोंद केल्ली.
कागाळदार विलासिनी शिरोडकार हांचे कागाळीच्या आधाराचेर पुलिसांनी जवाहर आनी सुदेश तिवरेंकार हांचे आड खंडणी, विनयभंग, मारपेट आनी गंभीर परिणामाची धमकी दिल्ल्याचो गुन्यांव नोंद केला. जाल्यार शेट्ये हांचे कागाळेच्या आधारार स्वप्नील शिरोडकार, विलास शिरोडकार, स्वप्नील हांची घरकान्न आनी एका अनवळख्या आड हल्लो करून मारपेट केल्ल्याचो गुन्यांव दाखल केला.
कागाळदार विलासिनी शिरोडकार हिच्या कागाळी प्रमाण शेट्ये आनी तिवरेंकार हांणी कागाळदार आनी तिच्या कुटूंबियां कडल्यान पयशे घेवपा खातीर विवीध अधिकार्यां मुखार कागाळी दाखल केल्यात. घडणुके वेळार दोनूय दुबावीतांनी कागाळदार, तांची सून श्रद्धा, पूत स्वप्नील आनी विलास हांकां बुरशीं उतरां दिलीं. तशें तिचो आनी तिचे सुनेचो विनयभंग केलो. उपरांत कागाळदाराच्या घरांत बेकायदो घुसून ताची सून, भुरग्यांक जमनीर धुकलून मारपेट केली. हाका लागून ते जखमी जाले. तशेंच दुबावितांनी पयशांची मागणी पुराय करूंक ना जाल्यार गंभीर परिणामांची धमकी दिली, अशें कागाळींत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
