भांगरभूंय | प्रतिनिधी
वास्कोः काटे बायणाच्या उमेश हरिजन खून प्रकरणांत फरार आशिल्ल्या तिनूय दुबावितांक मुरगांव पुलिसांनी बेळगावी कर्नाटकांत आयतारा अटक केली. ह्या खून प्रकरणांत पांच जाणांचो आस्पाव आशिल्लो. तातूंतल्या दोगांक खून जाल्लो त्याच दिसा अटक केल्ली.
काटे बायणां 5 सप्टेंबराक दनपारां उमेश हरिजन (30) हाचो कोयतो आनी चाकवान खून केल्लो. ह्या खुनाक लागून थंयची गुंडागिरी चर्चेंत आयिल्ली. खून करून दुबावीत दुचाकी वयल्यान गोंया भायर पळून वचपाच्या यत्नांत आशिल्ले दीपक साहनी आनी अमीर हुसैन हांकां फोंडें पुलिसांनी फाटलाव करून ताब्यांत घेतिल्ले. तांकां सात दिसांची पुलीस कोठडी फर्मायल्ली. तांची कोठडी सोमारा सोंपता ताका लागून तांकां परतून न्यायालयांत उबे करतले.
ह्या खून प्रकरणांतले फरार आशिल्ले परश्य उर्फ परशुराम दोडामणी (25), जुम्मन शेख (28) आनी दुर्गाप्पा मदार (28) हांकां धरचे खातीर पुलिसांनी साबार सुवातांचेर धाड घातिल्ली, पूण तांचो पत्तो लागनाशिल्लो. ते तिगूय गोंया भायर पळून गेल्ले. ते बागलकोट कर्नाटकांत आशिल्ल्याची म्हायती मुरगांव पुलिशेक मेळटकच पुलीस थंय गेले. थंय पावपा पावपाक ते तिगूय दुबावीत बागलकोट सावन बेळगावी वटेन गेल्ल्याची म्हायती मुरगांव पुलीस पंगडाक मेळ्ळी. ते म्हायतीच्या आदारान तांकां बेळगावी धरले. तांकां घेवन पुलीस पंगड रातच्या 8.30 वरांचेर तो मुरगांव पुलीस स्टेशनाचेर पावलो. ह्या प्रकरणाचो पुलीस स्टेशनाचे निरिक्षक राघोबा कामत हे वास्कोचे उपअधिक्षक राजेश कुमार हांच्या मार्गदर्शना खाला फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
