भांगरभूंय | प्रतिनिधी
‘पीडब्ल्यूडी’चेर दोन मंत्र्यांचो दोळो
भांगरभूंय । प्रतिनिधी
पणजीः आलेक्स सिक्वेरा हांचो मंत्रीमंडळांत आस्पाव जाल्ल्यान हेर मंत्र्यांच्या खात्यांत लेगीत बदल जातलो. पूण विश्वजीत राणे, मॉवीन गुदिन्हो, बाबूश मोंसेरात आनी रोहन खंवटे ह्या चार मंत्र्यां कडेन अतिम्हत्वाचीं खातीं आसात. हे खातीर तांच्या खात्यांनी बदल करतना मुख्यमंत्री डॉ. प्रमोद सावंत हांचेर व्हड टेन्शन येवपाक शकता.
नवे मंत्री आलेक्कस सिक्वेरा हांचे कडेन सध्या आदले मंत्री निलेश काब्राल हांचे कडेन आशिल्ल्या पीडब्ल्यूडी सयत हेर खात्यांची जापसालदारकी दिल्या. पूण, तांची पुराय चड आशिल्ल्यान तांकां हेर खातीं दिवपाचो विचार मुख्यमंत्र्यान चलयला. काब्राल हांकां मंत्रीमंडळांतल्यान काडिल्ल्यान दोन मंत्र्यांची नदर ‘पीडब्ल्यूडी’चेर आसा. अतिम्हत्वाचीं खातीं चार मंत्र्यां कडेन आशिल्ल्यान तांचे मदल्या कोणाची खातीं काडचीं, असो प्रस्न मुख्यमंत्री आनी भाजपा मुखार उबो रावपाची शक्यताय आसा. चार मंत्र्यां कडेन अतिम्हत्वाचीं खातीं आसात, ह्या मुद्द्या वयल्यान हे आदींय हेर मंत्र्यां मदीं धुसफूस चलताली. ताका लागून आतां खात्यांनी बदल जालो जाल्यार आपल्याक बरीं खातीं मेळटलीं, अशी आस्त कांय मंत्र्यांनी बाळगिल्या. पूण हो बदर करतना मुख्यमंत्री आनी पक्षा मुखार खूबशीं आव्हानां उबीं रावतलीं, जाल्यार कांय जाणांच्या वाट्याक निरशेवणी येतली, अशें सुत्रांनी म्हणलां.
मंत्रीमंडळांत फक्त दोगूच मूळ भाजपाचे
निलेश काब्राल हांकां मंत्रीमंडळांतल्यान काडिल्ल्यान 12 मंत्र्यांच्या मंत्रीमंडळांत आतां मुख्यमंत्री डॉ. प्रमोद सावंत आनी सुभाष फळदेसाय हे दोगूच मंत्री मूळ भाजपाचे उरल्यात. उरिल्ले 10 मंत्री हेर पक्षांतल्यान आयात केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
