भांगरभूंय | प्रतिनिधी
भांगरभूंय । खबरां मेज
पणजीः 29 सप्टेंबर ह्या आंतरराष्ट्रीय अणकार दिसा निमतान खांडोळें- माशेलच्या सरकारी म्हाविद्यालयाच्या हिंदी विभागान अनुवाद उत्सवाचें आयोजन केल्लें. लेखक मुकेश थळी हांणी दिवली पेटोवन ताचें उक्तावण केलें. ह्या वेळार म्हाविद्यालयाची प्राचार्य डॉ पूर्णकला सामंत, हिंदी विभाग मुखेली डॉ आशा गेहलोत, डॉ सपना पेळपकार आनी हेर मानेस्त हाजीर आशिल्ले.
अणकार विशयाचेर पदविका अभ्यासक्रम सुरूकरपी खांडोळें म्हाविद्यलाय हें गोंयांतलें पयलें म्हाविद्यालय आसा. ह्या वेळार रेडिओ आनी टेलिव्हिजन बातम्यांचो अणकार ह्या विशयाचेर मुकेश थळी हांणी विद्यार्थ्यांक मार्गदर्शन केलें. अणकार ही सराव केल्यार येवपाची कला आसा अशें तांणी देखी दिवन दाखोवन दिलें. रेडिओचेर बातम्यो दितना भाश सुटसुटीत आनी ल्हान वाक्यांची आसपाक जाय. गुगल ट्रान्सलेटर उपलब्द आसा, मात ती यंत्रणा विकसीत जाता देखून अणकार करतना जतनाय आनी दक्षता बाळगुवपाक जाय अशे तांणी सांगलें.
हिंदी भाशेंत कांय शब्दांचो अर्थ कोंकणी आनी मराठी परस वेगळोच आसता. ताका लागून कसो घुस्पागोंदोळ जाता ताचें विवेचन थळी हांणी केलें. अणकाराच्या मळार उपलब्द आशिल्ल्या संदीची तांणी म्हायती दिली. प्राचार्य पूर्णकला सामंत हिणे प्रास्तावीक केलें. डॉ आशा गेहलोल हिणे आपले विचार मांडले. डॉ सपना पेळपकारान सूत्रसंचालन केलें आनी प्रा. सची नायक हिणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
