भांगरभूंय | प्रतिनिधी
फोंडें, प्रतिनिधी ः तामसुली – खांडोळेंच्या धनंजय च्यारी हांच्या वर्कशॉपाक बिरेस्तारा रातीं 10.15 वरांचेर उजो लागलो. वर्कशॉपात आशिल्लें सगळें सामान उज्यांत लासलें. विशेश म्हळ्यार वर्कशॉपात वीज जोडणी नाशिल्ल्यान उजो लागपाचे नेमके कारण कितें हें आजून स्पश्ट जावंक ना. उज्याक लागून सुमार चार लाखांचें लुकसाण जाल्ल्याचो दावो च्यारी हांणी केला.
तांणी बिरेस्तारा कामाक लागून लांकडी फळयो हाडिल्ल्यो. ते भायर काम करपाक जाय आशिल्लीं सगळीं यंत्रां वर्कशॉपांत दवरिल्लीं. रातच्या वेळार धनंजय च्यारी कुटुंबा सयत लागसारच्या देवळांत गेल्ले. पूण, देवळांत पावतकच तांकां कळ्ळें की वर्कशॉपाक उजो लागलो. म्हायती मेळटाच कुंडय, फोंडें आनी पोरन्या गोंयच्या उजो पालोवपी दळांनी वचून उजो नियंत्रणात हाडलो. हे संबंदी म्हाड्डोळ पुलिशेंत कागाळ दाखल केल्या. कारण, वीज जोडणी नासतना वर्कशॉपात उजो कसो लागलो हो प्रस्न उप्रासला. पुलिसांनी ह्या प्रकरणाची फुडली चवकशी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
