भांगरभूंय | प्रतिनिधी
फोंडें: खांडेपारा स्टेट बँक ऑफ इंडियाच्या एटीएम मशिना कुशीक आशिल्लें पासबूक प्रिंटर मशीन चोरून व्हेल्ल्या प्रकरणांत फोंडें पुलिसांनी गौतम रंजन कुमार राय (29, मूळ बिहार. सद्या रावपी पार-उसगांव) हाका अटक केल्या. 10 एप्रील दिसा फांतोडेर 2.50 ते 3.20 वरांच्या सुमाराक चोरी केल्ल्याचें सीसीटीव्ही कॅमेऱ्यांत कैद जाल्लें.
फोंडें पुलिसांनी दिल्ले म्हायती प्रमाण फाटल्या आयतारा अनवळखी मनशान चोरून व्हेल्लें पासबूक प्रिंटर बँकेचे फाटले वटेन आशिल्ल्या रस्त्याचे कुशीक फोडिल्ले स्थितींत दिसून आयलें. चोरी प्रकरणांत बँकेचे वेवस्थापक रोहीत विश्वकर्मा हांणी फोंडें पुलीस स्टेशनार सोमारा रातीं कागाळ दिल्ली.
फोंडें पुलीस स्टेशनाचे उपअधिक्षक आशीष शिरोडकार हांच्या मार्गदर्शना खाला निरिक्षक वियकुमार चोडणकार आनी उपनिरिक्षक आदित्य वेळीप आनी हेर पुलीस कर्मचाऱ्यांनी सीसीटीव्ही कॅमेऱ्याच्या आदाराचेर दुबाविताक ताब्यांत घेवन चवकशी केली. दुबावितान चोरयेचो गुन्यांव मान्य केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
