भांगरभूंय | प्रतिनिधी
पणजी, प्रतिनिधी : बेगिनात बेगिन खणी सुरू करपाक सरकारान खण ब्लॉकांक पर्यावरण दाखले (ईसी) दिवपाची प्रक्रीया सुरू केल्या. दाखले दिवपा खातीर कायद्या प्रमाण भौशिक सुनावणी घेवप गरजेची. मोन्त दे शिरगाव खण ब्लॉका खातीरची भौशिक सुनावणी सोमारा 18 जानेवारी 2024 दिसा जातली. प्रदुशण नियंत्रण मंडळान हे विशींची सुचोवणी जारी केल्या.
दिवचल – सर्वणांच्या झांट्ये खेळा संकुलात ही सुनावणी जातली. शिरगाव पंचायत वाठारात 95.6712 हेक्टर जमनींत हो ब्लॉक आसा. लोकांचे म्हायती खातीर ह्या ब्लॉकाचो पर्यावरण मुल्यांकन अहवाल खण खाते, प्रदुशण नियंत्रण मंडळाच्या संकेतथळाचेर उपलब्ध आसा. संबंधीत पंचायतीत सुद्दा पर्यावरण मुल्यांकन अहवालाच्यो प्रती आसा. ह्या ब्लॉका विशी हरकती वा सुचोवण्यो मांडपाच्यो आसात, तांणी त्यो लेखी स्वरूपात सादर करच्यो, अशें मंडळान कळयलां. तशेच भौशिक सुनावणी वेळार उलोवपाचें आसा, तांकां भौशिक सुनावणेक हाजीर रावपाची मेकळीक आसा.
खण खात्यान दोन पावंड्यार 9 खण ब्लॉकांची पावणी केल्या. आनीक 4 ब्लॉकांची पावणी जातली, अशें मुख्यमंत्री डॉ. प्रमोद सावंत हांणी हाचे पयलीं स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
