भांगरभूंय | प्रतिनिधी
पुती गांवकार हांची पत्रकार परिशदेंत म्हायती
फोंडें: गोंयांतल्यो खणी सुरू करपाचीं आस्वासनां सरकारान सेगीत दिल्यांत. पूण खण अवलंबीत संघटीत जायनाशिल्ल्यान सरकारान अजून मेरेन खणी सुरू करपाच्या विशयाचेर गंभीरतायेन विचार केल्लो ना. तांत्रीक वा कायदेशीर मुद्याचें कारण दिवन सरकार खण अवलंबितांक आस्वासनां दीत आशिल्ल्याची म्हायती पुती गांवकार हांणी पत्रकार परिशदेंत दिली.
मुख्यमंत्री डॉ. प्रमोद सावंत हांणी स म्हयन्या भितर खणी सुरू करपाचें दिल्लें आस्वासन अजून मेरेन पुराय केल्लें ना. सरकार फक्त वेंचणुके वेळार खण अवलंबितांक नोकरीचें हांयस दाखोवन लाव उठयतात. तरी लेगीत खण अवलंबीत सरकाराचे भिरांतीक लागून संघटीत जायनात. खण अवलंबीत सरकार विरोधी चळवळ सुरू करिनाशिल्ल्यान सरकार खणी सुरू करपा विशीं गंभीरतायेन विचार करीत नाशिल्ल्याचें पुती गांवकार हांणी सांगलें.
प्रधानमंत्री नरेंद्र मोदी हांणी लेगीत गोंयांतल्यो बंद आशिल्ल्यो खणी सुरू करपाचें आस्वासन हाचे पयलीं 2019 वर्सा दिल्लें. पूण राज्य सरकारान खणी सुरू करपा विशीं अजून मेरेन प्रक्रिया सुरू केल्ली ना. खण अवलंबीत जो मेरेन पोटतिडकीन संघटीत जायनात तो मेरेन सरकाराचेर चेपण येवचें ना. वेंचणुके वेळार सरकारी नोकरी दिवपाचें आस्वासन खण अवलंबितांक दितात. ताका लागून खण अवलंबीत मुखार येवपाक भिरांत उक्तायतात अशें पुती गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
