भांगरभूंय | प्रतिनिधी
पहलगाम हल्ल्या उपरांत संवसारांतल्या खूबशा देशांनी आतंकवादी हल्ल्याचो निशेध केल्लो. तेच बरोबर हातूंत पाकिस्तानाचो हात आसा हें जगजाहीर आशिल्ल्यान खूबशा देशांनी पाकिस्तानाचो लेगीत निशेध केल्लो. फक्त चीन, बांगलादेश आनी तुर्की हांणी पाकिस्तानाक उक्तेपणान तेंके दिल्लो आनी पाकिस्तानाच्या घृणास्पद कृत्या आड पुराय देश भारता फाटल्यान उबे आसात अशें सांगिल्लें आनी अशें दिसून लेगीत येतालें. पूण ऑपरेशन सिंदूर कारवायेंत पाकिस्तानाचें व्हड प्रमाणांत लुकसाण जालें. हातूंत आतंकाद्यांचे अड्डे आनी पाकिस्तानाचे अॅर बेस उध्वस्त केले. हातूंत पाकिस्तानाक कोट्यांनी रुपयांचें लुकसाण सोंसचें पडलें. पाकिस्तान आतंकवाद्यांक आलाशिरो दिवपी देश ही गजाल अमेरिके सयत संवसाराक खबर आसून लेगीत अमेरिकेन पाकिस्तानाक वर्ल्ड बँके कडल्यान रीण मेळचें हे खातीर फुडाकार घेतलो आनी पाकिस्तानाक ताकतिकेन आयएमएफ ह्या वर्ल्ड बँकेन एक अरब अमेरिकन डॉलराचें रीण दिलें आनी हें रीण मंजूर करपाक अमेरिके सयत संवसारांतल्या खूबशा देशांचो हात आशिल्ल्याचें स्पश्टपणान दिसून आयलें. म्हणल्यार अमेरिका भारता सयत संवसाराक सांगता की आमी आतंकवाद्या आड खंबीरपणान उबे आसात. पूण अमेरिका पाकिस्तानाक मजत करून भारताचे फाटीर सुरो तोपपाचें काम करता. ताका लागून आयज अमेरिका विस्वासाक पात्र थारिल्लो देश उरिल्लो ना. आतंकवाद्यांची फॅक्टरी समजल्ल्या पाकिस्तानाक अमेरिका सदांच सारें उदक घालून उक्तेपणान तेंको दिता आनी सगले तरेची मजत करपाचें आस्वासन लेगीत दीत आसता, ही संवसाराचे नदरेन सामकी घातक आनी हुस्को करपा सारकी गजाल आसा.
अमेरिका सदचे प्रमाण आतांय दोट्टी नितीचो वापर करीत आसा. भारत-पाक संघर्श सुरू आसतना आयएमएफान पाकिस्तानाक ताकतिकेन एक अरब अमेरिकन डॉलराची मजत केली आनी हें रीण दिवपाचें काम अमेरिकेचेच मजतीन जालें. आयएमएफाचे पयलींचें रीण अजून मेरेन पाकिस्तानान फारीक केल्लें ना. तरी लेगीत ताका रीण दिलें. हाचेर भारत सरकारान निरशेणी लेगीत उक्तायली ही गजाल संवसाराक कित्याक दिसून येना. आयएमएफ ह्या वर्ल्ड बँकेन एक अरब अमेरिकन डॉलराचें रीण दिवन एक म्हयनो लेगीत जावपाचो आसा. जाल्यार आशियाई विकास बँक (एडीबी)न पाकिस्तानाक 80 कोटी डॉलराचें रीण 4 जून 2025 दिसा मंजूर केलें ही सामकी दुर्दैवी गजाल आसा. पाकिस्ताना कडल्यान अर्थीक मजतीचो दुरुपेग जावपाची शक्यताय भारतान उक्तायिल्ली आनी हुस्कोय उक्तायिल्लो. पूण हें सगलें नदरे आड करून आशियाई विकास बँकेन (एडीबी) पाकिस्तानाक सुमार 80 कोटी डॉलराचें रीण मंजूर केलें ही सामकी गंभीर आनी हुस्को करपा सारकी गजाल आसा. हेंवूय तितलेंच सत्य आसा की पाकिस्तानाक आतां मेरेन मेळिल्ल्या रिणाची 90 टक्के रक्कम ही आतंकवाद्यां खातीर खर्च जातली आनी 10 टक्के रक्कम पाकिस्तानी लोकां खातीर.
एडीबीचे अध्यक्ष मसाटो कांडा हांणी एक जून दिसा प्रधानमंत्री नरेंद्र मोदी हांची नवी दिल्लींत भेट घेतिल्ली. आनी चार जूनाक एडीबीन रीण मंजूर केलें. हाचे वेल्यान स्पश्ट जाता की संवसारांतल्या देशांचें दाखोवपाचे दांत वेगळे आनी खावपाचे दांत वेगळे हें स्पश्टपणान दिसून आयलें. प्रधानमंत्री नरेंद्र मोदी हांणी संवसारांतल्या खूबशा देशांक भेटी दिल्यो आनी संवसारीक पांवड्यार आपली बाजू घटमूट करपाचो यत्न लेगीत केलो. पूण जेन्ना पाकिस्तानाक वेगळे उडोवपाची वेळ आयली तेन्ना संवसारांतले खूबशे देश प्रत्यक्ष-अप्रत्यक्ष रितीन पाकिस्ताना वटेन उबे आसात ही गजाल आयएमएफ आनी एडीबी बँकेन मंजूर केल्ल्या रिणा वेल्यान स्पश्ट जाता. कारण संवसारांतले खूबशे देश ह्या बँकांचे वांगडी आसात. पूण पाकिस्तानाक रीण दिवपाक विरोध कोणेच कित्याक केलो ना? अशे खूबशे प्रस्न स्वताक आतंकवाद विरोधी म्हणपी देशा मुखार उपस्थीत जातात. हाचे वेल्यान स्पश्ट जाता की भारताचे दुस्मान पाकिस्तान, चीन, बांगलादेश, तुर्की हेच नासून खूबशे दुस्मान आसात ही गजाल पाकिस्तानाक दिल्ल्या रिणा वेल्यान स्पश्ट जाता.
म्हत्वाचें म्हणल्यार पाकिस्तानान आतां मेरेन घेतिल्ल्या खंयच्याच बँकेचें रीण अजून मेरेन फारीक केल्लें ना. तरी लेगीत ताका संवसारांतले खूबशे देश रीण मेळोवन दिवपा खातीर सहकार्य करतात ही गजाल संवसारीक बँकेन दिल्ल्या रिणा वेल्यान स्पश्ट जाता. हाचे वेल्यान स्पश्ट जाता की संवसारांतले खूबशे देश फक्त दाखोवपा खातीर भारता बराबर आशिल्ल्याचें दिसून येता. कारण पाकिस्तानाक दिल्ल्या रिणाचो विरोध फक्त भारतानूच केलो आनी हेरांनी फक्त पळोवपाची भुमिका घेतली. म्हजे म्हायती प्रमाण भारताची जायत आशिल्ली उदरगत हेर देशांक उस्तुऱ्यां वचूंक लागल्या. ताका लागून रिणाच्या माध्यमांतल्यान संवसारांतले भारत विरोधी देश अप्रत्यक्षरितीन पाकिस्तानाक मजत करतात आसुये.
रमेश कृष्णराव लांजेवार
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
