भांगरभूंय | प्रतिनिधी
उद्देगीक क्षेत्रांतल्या तज्ञांचो दावो
पणजी: गोंयांतल्या उद्देगीक वसणुकांनी सेगीत खंडीत जावपी वीज पुरवण, गोंयांत उत्पादन जावपी वस्तूंक राज्यांत मेळनाशिल्लें मार्केट, राज्य सरकारा कडल्यान मेळनाशिल्लो फावो तें फाटबळ, हेर राज्यां परस कामगारांक मेळपी चड पगार बी कांय कारणांक लागून फाटल्या कांय वर्सांत राज्यांतल्यो खूबशो कंपनीं बंद पडल्यात अशी प्रतिक्रिया उद्देगीक मळा वयल्या तज्ञां कडल्यान व्यक्त जायत आसा.
राज्य कारखाने कायदो (फॅक्टरी अॅक्ट) 1948 खाला 31 मार्च 2021 मेरेन नोंदणी जाल्ल्या 1,627 उत्पादन कारखान्यां मदीं 804 कारखाने विवीध कारणांक लागून बंद जाल्यात. जाल्यार 823 कारखाने सुरू आशिल्ल्याची म्हायती नियोजन, सांख्यिकी आनी मुल्यमापन खात्यान जारी केल्ल्या अहवालांतल्यान मुखार आयल्या.
हे विशीं अखील गोंय बार्ज धनी संघटणेचे अध्यक्ष अतुल जाधव हांची प्रतिक्रिया समजून घेतली तेन्ना तांणी म्हणलें, गोंयांतल्या उत्पादन कारखान्यांक कच्चो म्हाल हेर राज्यांतल्यान आयात करचो पडटा आनी ताचे पसून तयार केल्ल्या उत्पादनाची विक्री लेगीत गोंयांत मार्केट नाशिल्ल्यान हेर राज्यांनीच करची पडटा. तातूंतल्यान संबंदीत कारखान्यांक लुकसाण सोंसचें पडटा. दुसरे वटेन गोंयांत विजेचें दर हेर राज्यांचे तुळेन उणें आसलें तरी उद्देगीक वसणुकांनी वीज पुरवण खंडीत जावपाचे प्रकार सेगीत घडत आसतात. ताचो फटको उत्पादन कारखान्यांक बसता. गोंयांतल्या कामगारांक दितात तो पगार हेर राज्यांतल्या कामगारां परस चड आसा. तातूंतच तांकां म्हारगाय भत्तो दिवचो पडटा. हातूंत उत्पादन कारखान्यांक फायद्या परस लुकसाण चड जायत आसता. परिणाम लुकसाणीक लागून अशे कारखाने बंद केले बगर वेवस्थापना कडेन पर्याय उरना. ताका लागून कारखाने कायदो 1948 खाला नोंदणी केल्ले 50 टक्के कारखाने बंद पडल्यात अशें तांणी सांगलें.
सद्या कामगार खात्यान कामगारांच्या पगारांत वाड करपाचो निर्णय घेतला. ताचोय परिणाम फुडल्या काळांत कारखान्यांचेर जावंक शकता. ते खातीर अशे निर्णय घेवचे पयलीं सरकारान विचार करप गरजेचें आसा अशें जाधव हांणी म्हणलें.
राज्य उद्देग संघटणेचे अध्यक्ष दामोदर कोचकार हांणी लेगीत खूबशा उत्पादन कारखान्यांक खंडीत वीज पुरवणेक सेगीत सामकार वच्चें पडटा. राज्य सरकारा कडल्यान गरजेचें तें सहकार्य तांकां मेळना. ताका लागून उद्देगीक वसणुकांतले कारखाने बांद पडूंक लागल्यात अशें मत उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
