भांगरभूंय | प्रतिनिधी
पणजी : बाणस्तारी अपघात प्रकरणांत मर्सिडीझ मोटारीची धनी मेघना सिनाय सांवड्डेंकार हिणें अपघातांत मरण आयिल्ल्यांच्या कुटुंबियांक लुकसाण भरपाय आनी जखमींक वैजकी खर्चा खातीर 2 कोटी रुपया दिवपाचे न्यायालयांत मान्य केल्ले. ते प्रमाण, मेघना हिणें गोंय खंडपिठाच्या आदेशा प्रमाण 2 कोटी रुपया जमा केल्यात.
आयतार 6 ऑगस्टाक बाणस्तारी पुलाचेर मर्सिडीझ मोटारीन 6 वाहनांक नेटाचो धपको दिल्लो. हातूंत तिगांक मरण आयलें. जाल्यार हेर तिग जाण गंभीर जखमी जाल्ले. हातूंतल्या हळर्णकार हांचेर गोमॅकाँत उपचार सुरू आसात. ह्या प्रकरणांत म्हाड्डोळ पुलिसांनी मोटार चालक परेश हाका 7 ऑगस्टाक फांतोड्डेर सदोश मनीसवधाच्या गुन्यांवा खाला अटक केल्ली. उपरांत न्यायालयान ताका पुलीस कोठडेंत दवरपाचो आदेश दिल्लो. ती सोंपले उपरांत ताका न्यायालयीन कोठडेंत धाडिल्लो. उपरांत गोंय खंडपिठान ताका सशर्त जामीन मंजूर केलो.
मजगतीं, म्हाड्डोळ पुलिसांनी मर्सिडीझ मोटारीची धनी मेघना हिका नोटीस धाडून वैजकी चांचणी आनी चवकशे खातीर 10 ऑगस्टाक पुलीस स्टेशनाचेर हजेरी लावपाची नोटीस धाडिल्ली. ताका मेघना हिणें गोंय खंडपिठांत आव्हान दिल्ले. तशेंच अटकपूर्व जामिना खातीर अर्ज दाखल केल्लो. खंडपिठांत सुनावणी सुरू आसतना हे प्रकरण गुन्यांव फांट्या कडेन वर्ग केल्ले. मजगतीं, पुलिसानी मेघना हिची वैजकी चांचणी केल्या. तशेंच तिच्या भुरग्यांचो न्यायदंडाधिकाऱ्या मुखार जबाब नोंदयला.
मजगतीं, मेघना हिणें खंडपिठांत दाखल केल्ले याचिकेची सुनावणी जाली तेन्ना अपघतांत मरण आयिल्ल्यांच्या कुटुंबियांक आनी जखमींक 2 कोटी रुपया लुकसाण भरपाय दिवपाचे मान्य केल्ले. ते प्रमाण तिणें न्यायालयांत 2 कोटी रुपया जमा केल्यात.
मजगतीं, ह्या प्रकरणाची फुडली सुनावणी जाल्यां 6 सप्टेंबराक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
