भांगरभूंय | प्रतिनिधी
भांगरभूंय । प्रतिनिधी
पणजी : दक्षीण गोंयांतल्या एका तरणाट्याक क्रेडीट कार्ड संबंदी फुडली प्रक्रिया करपा खातीर बँकेचो अधिकारी आशिल्ल्याचें सांगून 9 लाख रुपयांची फटवणूक केल्ल्या प्रकरणांत सायबर गुन्यांव विभागान अहमदाबाद- गुजरात हांगच्या दिलीप केशवाला (20) ह्या दुबाविताक अटक केल्या. ताका मडगांवच्या पयलो वर्ग न्यायालयान 10 दिसांची पुलीस कादय दिल्या.
फटवणुकीचें हें प्रकरण फाटल्या मे म्हयन्यांत हे विशीं सायबर विभगांत कागाळ केल्ली. बँक अधिकारी सांगून केशवाला हांणे त्या तरणाट्याक मोबायलाचेर अॅप इन्स्टॉल करपाक लायलें. उपरांत ताका बँक खात्यांतल्यान वेव्हार करपाक सांगलें. उपरांत ताच्या खात्यांतल्यान 9 लाख रुपये काडले.
सायबर गुन्यांव विभागान केल्ल्या तपासात केशवाला हो अहमदाबाद हांगा आशिल्ल्याची म्हायती मेळ्ळी. पुलीस निरीक्षक देवेंद्र पिंगळे हांच्या फुडारपणा खाला उपनिरीक्षक सर्वेश सावंत, व्ही पाटील, महादेव गांवस, योगेश खांडेपारकार, मयूर राणे, देवेंद्र कुंकळळीकार हांच्या पंगडान 10 ऑगस्टाक थंय वचून बिरेस्तार 18 ऑगस्टाक ताका अटक केली. शुक्राराक ताका न्यायालयांत रिमांडा खातीर उबें केलें तेन्ना ताका 10 दिसांची पुलीस कादय दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
