क्रिकेटीच्या देवाचो वाडदीस

भांगरभूंय | प्रतिनिधी

सचीनाची सगल्यांत व्हडली शक्त ही ताची मानसीक खंबीरताय आशिल्ली. जाका लागून तो चेपणा खाला बरी कामगिरी करूंक शकलो.

क्रिकेट हो भारतांतलो सगल्यांत लोकप्रीय खेळ. म्हणून क्रिकेट हो भारताचो धर्म आसा अशें मानतात, आनी खेळांत सचीन तेंडुलकर हाणें जी दोळे दिपकावपी कामगिरी केल्या ताका लागून ताका क्रिकेटीचो देव मानतात. आयज ह्याच क्रिकेटीच्या देवाचो म्हणल्यार सचीन तेंडुलकराचो 52 वो वाडदीस. 24 एप्रील 1973 दिसा मुंबयंत सचीनाचो जल्म जालो. ताचो बापूय रमेश तेंडुलकर. ते प्राध्यापक आशिल्ले. तशेंच मराठीतले नामनेचे साहित्यीक आशिल्ले. जाल्यार आवय शिक्षिका आशिल्ली. त्या काळांतले नामनेचे संगीतकार सचीनदेव बर्मन हांच्या नांवा वेल्यान ताचें नांव सचीन अशें दवरलें.
सचीनान शारदाश्रम विद्यामंदीर हे शाळेंत रमाकांत आचरेकर हांचे कडल्यान क्रिकेटीचे धडे घेवपाक सुरवात केली. रमाकांत आचरेकर हांणी भुरगेपणांतूच सचीनाची गुणवत्ता पळोवन ताका प्रशिक्षण दिलें. शाळेंत आसतनाच सचीनान ताचे शाळेंतलो वांगडी इश्ट विनोद कांबळी हाचे सयत हॅरीस शिल्ड सर्तींत 664 धांवड्यांची विक्रमी भागिदारी केली. सचीनान ताचे पयले श्रेणीचे मॅचींत शेंकडो मारून विक्रम केलो. तेन्ना ताची पिराय 15 वर्सां 232 दीस आशिल्ली आनी त्या वेळार पयले मॅचींत शेंकडो मारपी तो सगल्यांत तरणाटो खेळगडो आशिल्लो. सचीन हो असो एकूच खेळगडो आसा जाणें रणजी, दुलीप आनी इराणी करंडाचे पयले मॅचींत शेंकडे मारले.
देशा भितर खेळिल्ले क्रिकेटींत दोळे दिपकावपी कामगिरी केल्ल्यान पिरायेच्या 16 व्या वर्साच सचीनाची भारतीय पंगडांत निवड जाली.
1989 वर्सा सचीन आपली पयली आंतरराष्ट्रीय मॅच पाकिस्ताना आड कराचीत खेळ्ळो. ते मॅचींत तो इम्रान खान, वसीम अक्रम, वकार युनूस, अब्दुल कादीर ह्या नामनेच्या बॉलरांक सामकार गेलो. ताचो पयले मॅचींत विशेश असो खेळ जालो ना. फक्त 15 धांवड्यांचेर तो आवट जालो. पूण फुडले मॅचींत ताणें अर्दशेंकडो मारून आपली तांक दाखोवन दिली. उपरांत तो भारतीय पंगडा बरोबर न्युझिलॅण्ड भोंवडेर गेलो. थंय 88 धांवड्यांची ताणें खेळी केली. पूण ताका खरी वळख मेळ्ळी ती 1991-92 चे ऑस्ट्रेलियन भोंवडेर.
हे भोंवडेर ताणें पर्थ हांगासरल्या उसळट्या आनी गतीमान पिचीचेर (खेळपट्टी) शेंकडो मारलो. जे पिचीचेर संवसारांतले नामनेचे बॅटसमन तग धरूंक शकनात अशा पिचीचेर सचीनान ऑस्ट्रेलियेच्या दर्जेदार बॉलरां मुखार शेंकडो मारिल्ल्यान हो खेळगडो ‘लंबी रेस का घोडा है’ अशें जाणकार म्हणूंक लागले. उपरांत सचीनान फाटल्यान वळून पळयले ना. संवसारांतल्या सगल्याच पिचीचेर ताणें धांवड्यो काडपाक सुरवात केली. 1996 च्या संवसारीक करंड सर्तींत ताणें सगल्यांत चड धांवड्यो काडून गोल्डन बॅट मेळयलें. 1990 च्या दसकांत जाल्यार सचीनाचे बॅटीन अक्षरशा खवदळ घालो. ऑस्ट्रेलिया, न्युझिलॅण्ड, इंग्लंड, दक्षीण आफ्रिका, वेस्ट इंडीज, पाकिस्तान, श्रीलंका, झिम्बाब्वे अशा सगल्या पंगडां आड ताणें खोर्‍यांनी धांवड्यो काडल्यो. 1997 वर्सा विसडेनान ताका त्या वर्साचो उत्कृश्ठ वर्सुकीं खेळगडो म्हूण जाहीर केलें.
ह्याच वर्सा ताणें पयलेच फावटी टॅस्ट मॅचींत 1000 धांवड्यो केल्यो. हाची सचीनान 1999, 2001, 2002 वर्सा पुनरावृत्ती केली. सचीनान वर्सांत 1000 परस चड धांवड्यो करपाचो विक्रम सेगीत स फावटी केला. असो विक्रम करपी तो एकलोच खेळगडो आसा. सचीन तेंडुलकर हो क्रिकेट विश्वांत डॉन ब्रॅडमन हाचे उपरांत संवसारीक पांवड्यार सर्वोत्तम मानपी क्रिकेट खेळगडो आसा. 2002 वर्सा कारकिर्दीच्या बाराव्या वर्साच, विसडेनान डॉन ब्रेडमन हांचे उपरांत सार्वकालीक दुसरो सर्वोत्तम टॅस्ट खेळगडो आनी व्हीव्ह रिचर्डसा उपरांतचो दुसरो सार्वकालीक सर्वोत्कृश्ट एकादिसाचो बॅटसमन म्हूण सचीन तेंडुलकराची निवड केल्ली. स्वता डॉन ब्रॅडमन हांणी सचीनाचे बॅटिंगेंत स्वताची छबी दिसता अशें म्हणिल्लें.
सचीन हो नेमान बॉलिंग करिनासलो तरी ताणें 132 टॅस्ट मॅचींनी 37 विकेटी घेतल्यात. जाल्यार 365 एका दिसाच्या मॅचींनी 142 विकेटी घेवपाची कामगिरी ताणें केल्या. ज्या वेळार म्हत्वाचे बॉलर अपेशी थारताले त्या वेळार सचीनाक बॉलींग दिताले आनी खूबशे फावटी तो विकेटी घेवपाक येसस्वी थारला. जरी ताची बॉलिंगेंतली सरासरी 50 चे वयर आसली तरी ताका जम बशिल्ल्या बॅटसमनांची जोडी फोडपाचो हातगूण आशिल्लो बॉलर अशें समजतात.
सचीनाचें बॅटिंग तंत्र सामकें बरें आशिल्लें. ताका लागून ताका सेगीत धांवड्यो काडपाक मजत जाली. क्रिकेटीच्या सगल्या शॉट्सां मदीं तो माहीर आशिल्लो अनी खंयचेय परिस्थिती कडेन जुळोवन घेवपाची ताचे मदीं तांक आशिल्ली. सचीनाची सगल्यांत व्हडली शक्त ही ताची मानसीक खंबीरताय आशिल्ली. जाका लागून तो चेपणा खाला बरी कामगिरी करूंक शकलो. ताणें आपले बॅटीन भारता खातीर खूबश्यो मॅची जिखून दिल्यो आनी भारताच्या खूबशा व्हड जैतांनी ताचो मोलादीक वांटो आसा.
2003 वर्सा दक्षीण आफ्रिकेंत जाल्ल्या संवसारीक करंड सर्तींत ताका ‘मॅन ऑफ दी सिरीज’ पुरस्कार दिलो. पूण पंगड संवसारीक करंड जिखूंक शकलो ना हाची ताका खंत आशिल्ली. भारताक संवसारीक करंड जिखून दिवप हें ताचें सपन आशिल्लें. हें सपन 2011 वर्सा पुराय जालें. सचीनाचें दुसरें नांव म्हणल्यार विक्रम. विक्रमांचे विक्रम करपाची असादारण कामगिरी ताणें केली. ताचे विक्रम सांगपाक वचप जाल्यार पान लेगीत पावचें ना.
आंतरराष्ट्रीय मॅचींनी 100 शेंकडे मारपी तो एकलोच खेळगडो. सगल्यांत चड धांवड्यो, सगल्यांत चड मॅन ऑफ दी मॅच, सगल्यांत चड मॅन ऑफ दी सिरीज, सगल्यांत चड मॅची अशे कितलेशेच विक्रम ताच्या नांवार आसात. ताका खूबशे पुरस्कार मेळ्ळ्यांत. हातूंत अर्जून पुरस्कार, राजीव गांधी खेलरत्न पुरस्कार, पद्मविभूषण ह्या पुरस्कारांनी ताका भोवमानीत केला. भारतरत्न ह्या देशाच्या सर्वोच्च पुरस्कारान लेगीत ताचो भोवमान जाला. भारतरत्न मेळोवपी तो एकसुरोच खेळगडो थारला. तो राज्यसभेचो खासदारूय आशिल्लो. भारतीय हवाई दळान ताका ग्रूप कॅप्टन हो भोवमानात्मक हुद्दो भेटयला. ताका खूबशा विद्यापिठाची डिलीट ही मानाची पदवी मेळ्ळ्या. सचीनाचो खेळ पळयतकच आमी ल्हानाचे व्हड जाले. ताचो खेळ पळोवंक मेळ्ळो हे आमच्या पिळगीचे भाग्य. 140 कोटी भारतीयांनी खोशी मनोवपाची संद सेगीत निर्माण करून दिवपी ह्या क्रिकेटीच्या देवाक 52 व्या वाडदिसाचीं परबीं.

श्याम ठाणेदार
9922546295