भांगरभूंय | प्रतिनिधी
-खोतीगांवांत बिरसा मुंडा रथयात्रेचो शुभारंभ
काणकोणः प्रधानमंत्री नरेंद्र मोदी हांच्या नेतृत्वाक लागून तळागाळांतल्या दुर्लक्षीत स्वातंत्र्यसैनानींची जीण देशा मुखार आयली. तातूंतल्यानूच आदिवासी समाजाचे क्रांतीवीर बिरसा मुंडा लोकां मुखार आयले. तांकां अादिवासींचे दैवत म्हणल्यार वावगे थारचे ना. आदिवासी समाजाच्या हक्का खातीर आनी तांच्या जमीन मालकी हक्का खातीर दिल्ल्या लड्या खातीर तांकां ‘धरती आबा’ अशेंय म्हणटात. बेगिनूच भगवान बिरसा मुंडा हांचे व्हड स्मारक उबारतले, अशें गोंय विधानसभेचे सभापती रमेश तवडकार हांणी सांगलें.
आदिवासी मंत्रालय, केंद्र सरकार, आदिवासी संचालनालय-गोंय सरकार, अादिवासी संशोधन केंद्र, आदर्श युवा संघ आनी बलराम शिक्षण संस्था हांच्या जोड पालवान शेनवारा आयोजीत केल्ल्या भगवान बिरसा मुंडा रथयात्रा आनी आदिवासी लोकनृत्य उत्सवाच्या उक्तावणा वेळार तवडकार मुखेल सोयरे ह्या नात्यान उलयताले.
ह्या वेळार माचयेर समाजकल्याण मंत्री सुभाष फळदेसाय, आमदार गणेश गांवकार, आदले आमदार दामू नायक, जिल्हो पंचायत वांगडी कुशाली वळीप आनी मानेस्त हाजीर आशिल्ले.
ह्या वेळार गणेश गांवकार हांचे भाशण जाले. दामू नायक हांणी म्हणलें, तरणाट्यांनी क्रांतीकारकांचे कार्य जाणून घेवपाक जाय. सुभाष फळदेसाय हांणी म्हणलें, बिरसा मुंडा हे आपल्या कर्तृत्वान व्हड जाले. तांचो त्याग आमी सदांच मतींत दवरपाक जाय. आदिवासी समाजाचे जावपी शोशण आनी अत्याचारा आड आवाज काडपाक देशभर हो उत्सव मनयतात. बिरसा मुंडा हांच्या आशिर्वादान समाजांतल्या लोकांक मुखार वचपाची प्रेरणा मेळटली, अशें तांणी म्हणलें.
सुरवातीक मानेस्तांनी बिरसा मुंडा हांच्या फोटवाक फुलांहार अोंपून दिवली पेटोवन कार्यावळीचें उक्तावण केले. सुत्रसंचालन दामोदर वेळीप, स्वागत देसाय हांणी केले, जाल्यार उपकार अशोक गांवकार हांणी मानले.
उपरांत खोतीगांवांतल्या बायलांनी बिरसा मुंडा हांच्या रथाची उंवाळणी केली. अवे-खोतीगांवां रथयात्रेक सुरवात जावन गांवडोंगरी भाटपाल, चावडी, काणकोण मार्गान रथ खोला दाखल जालो.
मजगतीं, कर्वे-गांवडोंगरी, गुळे, खोला रथयात्रेक लोकांनी येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
