कोवीड काळांतलो परवानो शुल्क माफ करपाक खंडपिठाचो न्हयकार

भांगरभूंय | प्रतिनिधी

कसिनो कंपनींनी 321.66 कोटी जमा करचे

गोंय सरकाराक 50 टक्के रक्कम काडपाक मेकळीक

पणजी: कोवीड काळांत गोंयांतले कसिनो बंद दवरिल्ले. त्या काळांतलो परवानो शुल्क माफ करपाक मुंबय उच्च न्यायालयाच्या गोंय खंडपिठान न्हयकार दिल्लो. तशेंच कसिनो कंपनींक चार सप्तकांत सगले 321.66 कोटी रुपया जमा करपाक सांगलां. जाल्यार कसिनो कंपनींनी खंडपिठांत जमा केल्ली 50 टक्के रक्कम काडपाक सरकाराक मेकळीक दिल्या.

ह्या प्रकरणांत गोंयांतल्या 13 कसिनो कंपनींनी खंडपिठांत याचिका दाखल केल्ली. तातूंत तांणी राज्य सरकार आनी गृह खात्याचे अव्वल सचिवांक प्रतिवादी केले. ते प्रमाण कोविडाचो प्रादुर्भाव जायत आशिल्ल्यान गोंयांत निर्बंध लागू केले.

ते प्रमाण राज्य सरकारान 15 मार्च 2020 ते 31 ऑक्टोबर 2020 आनी 1 मे 2021 ते 30 सप्टेंबर 2021 ह्या काळांत गोंयांतले कसिनो बंद केल्ले. वयल्या काळांत राज्य सरकारान नोटीस आनी पत्रवेव्हार करून कसिनो कंपनीक वर्सुकी परवाने शुल्क भरपाक सांगिल्लें. तशेंच सरकारान गोंय दमण आनी दीव भौशीक जुगार कायदो 1976 त दुरुस्ती करून तशेंच अधिसुचोवणी जारी करून कसिनो कंपनींक प्रलंबीत वर्सुकी परवाने शुल्क भरपाक सांगिल्लें. अशें आसतना कांयच जायनाशिल्ल्यान निमाणें राज्य सरकारान 25 नोव्हेंबर 2022 दिसा आदेश काडून 1 डिसेंबर 2022 दिसा अधिसुचोवणी जारी करून 30 दिसां भितर आनी 31 डिसेंबर 20022 दिसा पयलीं 12 टक्के कळंतरा सयत प्रलंबीत आशिल्लो कोवीड काळांतलो परवानो शुल्क भरपाची मागणी केली.

हे मागणेक कसिनो कंपनींनी खंडपिठांत याचिका दाखल करून वर्सुकी परवानो शुल्क माफ करपाची मागणी केली. ह्या प्रकरणांत खंडपिठांत सुनावणी जाली तेन्ना, प्रलंबीत काळांत 12 टक्के कळंतर लागचें ना, अशें स्पश्टीकरण सरकारान खंडपिठांत केल्लें. त्या वेळार खंडपिठान कंपनींक 50 टक्के रक्कम जमा करपाक सांगलें.

ह्या प्रकरणाची सुनावणी पुराय करून खंडपिठान कसिनो कंपनीचो दावो भायरायलो. तशेंच राज्य सरकारान 25 डिसेंबर 2022 दिसा जारी केल्लो आदेश रद्द करपाक न्हयकार दिलो. हाचे बगर चार सप्तकांत पुराय रक्कम जमा करपाक सांगलें. तशेंच ही रक्कम जमा केल्यार 12 टक्के प्रलंबीत कळंतर माफ करपाक थाकाय दिल्या. तेच बरोबर राज्य सरकाराक कसिनो कंपनींनी खंडपिठांत जमा केल्ली रक्कम काडपाक मेकळीक दिल्या.