भांगरभूंय | प्रतिनिधी
विमानतळांचेर जातली आंतरराष्ट्रीय प्रवाशांची तपासणी
खबरां संस्था
नवी दिल्लीः चीनांत परतून एकदां कोरोनाचो उद्रेक वाडत आसून स्थिती गंभीर जायत आसा. अोमायक्रॉनच्या सबवेरियंट बीएफ.7 विशाणूक लागून चिनांत कोरोनाचीं प्रकरणां वाडल्यात. केंद्र सरकारानूय हाची गंभीर दखल घेतल्या. बुधवारा केंद्रीय मंत्री मनसुख मांडविया हांणी भारतांतल्या कोरोनाच्या परिस्थितीचेर ताकतिकेची बसका घेतली.
केंद्रान सगलीं राज्यां आनी केंद्रशासीत प्रदेशांक सादूर रावपाक सांगलां. विशाणूंतल्या नव्या उत्परिवर्तनाची म्हायती मेळोवपाक सदच्या कोरोना चांचण्यांनी सांपडिल्ल्या नमुन्यांचे पुराय जनुकीय क्रमनिर्धारण (जिनोम सिक्वेसिंग) करपाची सुचोवणी सगलीं राज्यां आनी केंद्रशासींत प्रदेशांक केल्या.
हे बसके उपरांत भलायकी मंत्रालयान व्हड निर्णय घेतला. आतां भारतांतल्या येवपी सगल्या चीनांतल्यान येवपी दरेक व्यक्तीची तशेंच आंतरराष्ट्रीय प्रवाशांची विमानतळार तपासणी करपाच्यो सुचोवण्यो केंद्रान सगल्या राज्यांक निर्देश दिल्यात.
केंद्र सरकार हे विशीं सादूर आसून कालच्यान म्हणल्यार बुधवारच्यान विमानतळार विदेशी प्रवाशांची तपासणी सुरू केल्या. तशेंच देशांतल्या विमानतळांचेर आंतरराष्ट्रीय प्रवाशांचे नमुने घेवपाक सुरवात केल्या, अशी म्हायती भलायकी मंत्रालयाच्या सुत्रां कडल्यान मेळ्ळ्या.
लोकांनी सामाजीक अंतर आनी मास्क घालपाचें आवाहन केंद्र सरकारान केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
