भांगरभूंय | प्रतिनिधी
कृष्णा साळकारः क्रूज प्रकरणांत कारवाय जावपाकूच जाय
भांगरभूंय । प्रतिनिधी
मुरगांवः वास्को शारांतल्या लोकांक प्रदुशणाचो त्रास जावचो न्हय हे खातीर वास्को शारांतल्यान कोळशाची येरादारी करपाक आमचो विरोध कायम आसा. कोळसो आनी हेर मालाची येरादारी करचे खातीर म्हामार्ग बांदला, ताचो वापर करचो. वास्को शारांतल्यान कोळसो आनी हेर मालाची येरादारी केली जाल्यार प्रदुशणांत आनीक वाड जातली. ताचो परिणाम लोकांचे भलायकेचेर जातलो. ताका लागून शारांतल्यान कोळश्याची येरादारी करपाक आमचो विरोध फुडारांतूय आसतलो, अशें वास्कोचे आमदार कृष्णा साळकार हांणी सांगलें.
खण प्रस्न सोडयिल्ले खातीर मुख्यमंत्र्यांक परबीं दिवचे खातीर आमदार साळकार हांणी पत्रकार परिशद आयोजीत केल्ली. ह्या वेळार ते उलयताले. तांचे वांगडा मुरगांव भाजपा मंडळाचे अध्यक्ष संजय सातार्डेंकार, लियो रॉड्रिगीज, वास्को भाजपा मंडळाचे अमेय चोपडेंकार, गिरीश बोरकार आनी हेर पदाधिकारी हाजीर आशिल्ले.
टॅक्सी संघटणे वतीन पर्यटकांक बशींत चडपाक मनाय केल्ल्याचे घडणुकेक लागून आंतरराष्ट्रीय मळाचेर गोंयच्या नांवाक खत लागलां. पर्यटन मंत्र्यान ह्या प्रकरणांत टॅक्सी कावंटर सुरू करपाचो निर्णय घेतला. तशेंच मुरगांव बंदरांतल्या आंदोलन प्रकरणाचेर मुख्यमंत्री डॉ. प्रमोद सावंत हांचे कडेन चर्चा करून उपाय काडटले, अशी म्हायती वास्कोचे आमदार कृष्णा साळकार हांणी दिली.
एमपीटीच्या क्रूज धक्या भायर विदेशी पर्यटकांक त्रास जालो, ही घडणूक खऱ्यांनी दुर्दैवी. गोंयांत अश्यो घडणुको घडपाक जायना. गोंय हें एक बरें पर्यटन थळ. अतिथी देवो भव मानपी राज्यांत अशो प्रकार घडप ही लजेची गजाल. ज्या लोकांनी हें काम तें सामकेंच चुकीचें आसा. फुडारात अश्यो घडणुको घडच्यो न्हय हे खातीर ह्या प्रकरणांत शिस्तभंगाची कारवाय जावपाकूच जाय. हे घडणुके उपरांत पर्यटन मंत्री रोहन खंवटे हांणी ताकतिकेन पावलां उखलून सरकारी टॅक्सी कावंटर सुरू करपाची घोशणा केल्या. हो उपाय योग्य आसा. येरादारी मंत्री मॉवीन गुदिन्हो हांणी ह्या प्रकरणाची दखल घेवन दोशी टॅक्सी चालकां आड खर कारवायेचे आदेश दिवन योग्य पावल उखल्लां. फुडारांत पर्यटकांक अशे त्रास जावचे नात, हे खातीर खर पावलां उखलपाची गरज आसा, अशें आमदार साळकार हांणी सांगलें.
मतदारसंघांचे उदरगती खातीर पक्षपाती करिनासतना दरेका आमदाराक अडेज कोटी रुपयांची तजवीज मुख्यमंत्र्यान केल्या, ही खोशयेची गजाल. हे येवजणेचो निधी फुडल्या वर्सा मुख्यमंत्री 5 कोटी मेरेन वाडयतले, असो विस्वास आमदार साळकार हांणी उक्तायलो. काणकोण ते पेडणें मेरेन उदरगतीची गंगा व्हांवता. प्रधानमंत्री नरेंद्र मोदी हांणी मोपा विमानतळाचें तशेंच आयुष हॉस्पिटलाचें उक्तावण केलें. विवीध उदरगतीचीं कामां अंदूं चालीक लागल्यांत. खणींचे पावणेक सुरवात जाल्या. ताका लागून गोंयांत खोशयेचें वातावरण आसा, अशें साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
