भांगरभूंय | प्रतिनिधी
आग्नेल फर्नांडीसः सनबर्ना विशीं लोकांक विस्वासांत घेवचे
भांगरभूंय । प्रतिनिधी
म्हापशें: सनबर्न महोत्सवाक गोंयांत लोकांचो जावपी वाडटो विरोध पळोवन सरकारान मुंबय जावपी कोल्ड प्ले सारक्या महोत्सवाचो पर्याय म्हूण विचार करचो, असो सल्लो कळंगूटचे आदले आमदार आग्नेल फर्नांडीस हांणी सरकाराक दिला.
दक्षीण गोंया सयत गोंयांतल्या हेर वाठारांनी लोक सनबर्नाक विरोध करतात. आपल्या मतदारसंघांत कांदोळी वा शिवोली मतदारसंघांतल्या वागातोर हे आदलेच सुवातेर हो महोत्सव आयोजीत केल्यार आपलो ताका तेंको आसतलो, अशें आमदार मायकल लोबो हांणी म्हणलां. हे फाटभुंयेर आग्नेल फर्नांडीस उलयताले.
आपूण सनबर्नाच्या विरोधांत ना. मात लोकांक नाका जाल्यार सरकारान हो तशेंच हाचे वरी हेर कसलेच महोत्सव गोंयांत आयोजीत करपाक जायना. कळंगूटे सोमारा कितली येरादारी आसता ती पळयात आनी जर सनबर्न आयलो जाल्यार येरादारीचें कितें जातलें ताचोय विचार करचो. आदीं कांदोळे सनबर्न जातालो, तेन्ना इतली येरादारी नाशिल्ली. आतां लोकांचो विरोध आसा जाल्यार सनबर्न महोत्सव आयोजीत करचो न्हय. तशेंच येरादारीचें योग्य नियोजन केले उपरांतूच अश्या महोत्सवांत मंजुरी दिवची, अशें फर्नांडीस हांणी सांगलें.
संगीत महोत्सवा विशीं लोकांचे विशय आनी समस्या आसात. त्यो सोडयतले कशे? लोकांक संगिताची समस्या ना जाल्यार ड्रग्साची आसा. येरादारीचो प्रस्न आसा, ताचेर तुमी नियंत्रण कशे दवरतले, हाचेर स्पश्टीकरण दिवपाची गरज आसा. लोकांक त्रास जावचो ना, वेवसायिकांक फायदो जातलो, अशें आसा जाल्यार लोकांक विस्वासांत घेवपाक जाय, अशें फर्नांडीस हांणी सांगलें.
ज्या ज्या वाठारांनी सनबर्नाचो विशय काडटात, थंयचे सगळेच लोक ह्या महोत्सवाक विरोध करतात. सरकारान हो महोत्सव बंद करून दुसरो कसलोय संगीत महोत्सव हाडचो. कारण सनबर्न हो ड्रग्साचो महोत्सव हें पुराव्या सयत सिद्ध जालां. दर दिसा ह्या महोत्सवांत एका- दोगांक ड्रग्स चड घेतिल्ल्यान मरण येता. तेच खातीर आमी ह्या महोत्सवाचें बरे तरेन आनी नियोजनबद्ध आयोजन करतले, अशें ठोस आस्वासन दिवन सरकारान लोकांक समाधानी करपाक जाय, अशें फर्नांडीस हांणी सांगलें. आपल्याक दिसता कळंगूट मतदारसंघांत सनबर्न महोत्सव आयोजीत करप योग्य न्हय. येरादारीचे नदरेन आनी डिसेंबरांत हो महोत्सव नाकाच. फेब्रुवारी- मार्च ह्या ऑफ सिझनांत हो महोत्सव आयोजीत करचो. कारण त्या वेळार पर्यटक आसनात आनी अश्या महोत्सवा वरवीं पर्यटकांक गोंयांत हाडपाक मेळटलें. मात ते आदीं लोकांक समाधानी करपाक जाय. लोकांची शांतिकाय पेड्डेर जावची ना, हाचीय जतनाय घेवपाक जाय, अशें फर्नांडीस हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
