भांगरभूंय | प्रतिनिधी
पणजीः गोंय पर्यटन खातें २ ते ४ मे मजगतीं कोलवा गोंय खेळां प्राधिकरण मैदानाचेर ‘स्पिरीट ओफ गोवा’ हो महोत्सव घडोवन हाडटलें. गोंयची सोरो संस्कृती आनी जेवणाचें दायज मनोवपाचो ह्या महोत्सवा फाटलो हेत आसा, अशें पर्यटन संचालक केदार नायक हांणी सांगलें.
पणजे घडोवन हाडिल्ले पत्रकार परिशदेंत ते उलयताले. ह्या वेळार गोंय पर्यटन उदरगत महामंडळाचे सरवेवस्थापक गॅव्हीन डायस, उप सरवेवस्थापक दीपक नार्वेकार आनी पर्यटन सहाय्यक संचालक जयेश काणकोणकार हजर आशिल्ले.
ह्या महोत्सवांत घरगुती डिस्टलरी आनी गोंयचो सोरो तशेंच खाणांक उर्बा दिवपाची मोख दरवरल्या, अशें नायक हांणी सांगलें. परंपरीक जेवण रांदपाचेर आनी कॉकटेल मिक्सिंगचेर मास्टरक्लास जातली. तशेंच नामनेचे डिस्टीलर फेणी अणभव केंद्रां क्युरेट करतले. गोंयची कला आनी हस्तकलेचे प्रात्यक्षीक पळोवपाक मेळटलें. सेगीत तीन महोत्सवांत बॅण्ड सादरीकरण जातलें, अशें नायक हांणी सांगलें.
गोंयचें जेवण, सोरो, दर्जेदार संगीत आनी थळावे संस्कृतीचे उर्बेचेर ह्या महोत्सवांत भर दितले. लोकांनी ह्या तीन दिसांच्या महोत्सवांत वांटेकार जावन सुरबूस मनरिजवणीचो आस्वाद घेवचो, असो उलो सरवेस्थापक गॅव्हीन डायस हांणी मारला.
ह्या तीन दिसांच्या महोत्सवांत ४० स्टॉल आसतले. तातूंत गोंयचो तरातरांचो सोरो मांडटले. फकत जी आय टॅग काजू फेणी न्हय, जाल्यार खाशेली फेणी, प्रिमियम जीन, क्राफ्ट बीअर आनी हेर तरेचो सोरो आसतलो. जाल्यार गोंयचे जेवणांत फकत नाल्ल आनी काजुच्या जिन्नसा पलतडीं वचून केळीचें बोंड, कोकम, पणस, बिमलां आनी आंब्याचो आसपाव आशिल्लो. सारस्वत, कोंकणी आनी ख्रिस्ती खाण संस्कृती महोत्सवाक अणभवपाक मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
