भांगरभूंय | प्रतिनिधी
दोगां विदेशी बायलां कैद्यां आड गुन्यांव
भांगरभूंय I प्रतिनिधी
म्हापशेंः कोलवाळ बंदखणींतली मेटरन कर्मचारी जयश्री वेंगुर्लेंकार (53) हिका मारपेट केल्ल्याच्या आरोपा खाला कोलवाळ पुलिसांनी जेनेट (नायजेरियन) आनी प्रिशिला (घाना) ह्या दोगां विदेशी कैद्यां आड गुन्यांव नोंद केला.
ही घडणूक शुक्रारा सकाळीं 10.30 वरा मजगतीं बायलां कैदी विभागांत घडली. बंदखणींतल्या कैद्यांक सदचे प्रमाण सकाळीं विभागांतल्यान मेकळे सुवातेत भायर काडटात. उपरांत तांकां परत विभागांत घालतना दुबावीत प्रिशिला ह्या कैद्यान फिर्यादी मेटरन वेंगुर्लेंकार हिचे कडेन आपणाक घरा फोन करपाचो आसा, ते खातीर विभागाचे फाटक बंद करूं नाका, अशी विनवणी केल्ली.
पूण फिर्यादीन फाटकाक कुलूप लायिल्ल्याचे पळोवन तिचे कडेन वाद घातलो. तिका दुबावीत जेनेट हिणें साथ दिली. दोगांयनीय वेंगुर्लेकार हिका मारपेट केल्ल्यान ती बेशुद्ध जावन जमनीचेर पडली. तिका उपचारा खातीर म्हापशें जिल्हो हॉस्पिटलांत दाखल केल्या. हॉस्पिटलांत वेंगुर्लेकार हिचे मुळावे उपचार तशेंच एक्स-रे आनी सोनोग्राफी केले उपरांत तिका घरा धाडली.
उपरांत फिर्यादीन कोलवाळ पुलिशेंत घडिल्ल्या प्रकारा आड कागाळ दाखल केली. हे कागाळेच्या आदारान पुलिसांनी दुबावीत कैद्यां आड 353, 323 आनी 34 कलमा खाला गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.