भांगरभूंय | प्रतिनिधी
म्हापशें: कोलवाळे रोडरेज वेल्यान जाल्ल्या शुल्लक कारणाक लागून वाटेर मोटार आडवी घालून आनी दुचाकी चालक तरणाटो आनी तरणाटेक खर मारपेट प्रकरणांत फरार दुबावितांक पुलिसांनी अटक केली.
दुबावितां मदीं पंकज साळगांवकार (38), पंकज सडेकार (28) आनी देवेंद्र तेमकार (38) हांचो आस्पाव आसून ते तिगूय कोलवाळचे आसात.
ही घडणूक शेनवारा 16 वेर सांजवेळा 7.15 वरांच्या सुमाराक श्रीराम देवळा मुखार घडली. कागाळदार तरणाटी आनी तिचो इश्ट दोगूय म्हापशें सावन पीर्णा वताले. वाटेर कोलवाळ रोडरेज वेल्यान दुबावीत आरोपी पंकज साळगांवकार हाणें आपली मोटार आडवी घालून कागाळदार दुचाकी चालकाक आडायले आनी हेर दोगां वांगड्यांक आपोवन तिगांनी मेळून दोगांय दुचाकी वेल्यान वचप्यांक मारपेट केल्ली.
ही घडणूक घडत सावन दुबावीत आरोपी फरार आशिल्ले. तांकां पुलिसांनी सोमारा अटक केली. दुबावितां आड भादंसं 307, 341, 504, 506(2), 324 आनी 34 कलमा खाला खुनी हल्ल्याचो गुन्यांव नोंद केला.
फुडलो तपास पुलीस निरिक्षक विजय राणे हांच्या मार्गदर्शना खाला उपनिरिक्षक कुणाल नायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
