भांगरभूंय | प्रतिनिधी
म्हापशें: कोलवाळे पुलार मोटारीन अचकीत पेट घेतिल्ल्यान लासून गोबर जाली. हे दुर्घटणेंत मोटारींतले चारूय प्रवासी वेळारूच भायर सरिल्ल्यान सुखरुप वाटावले. हे चारूय प्रवासी पर्यटक आंध्र प्रदेशांतले आसात.
ही घडणूक सोमारा रातीं 10 वरांच्या सुमाराक घडली. महाराष्ट्र नोंदणीकृत मोटार म्हापशें सावन सावंतवाडीचे दिशेन वताली. कोलवाळ राष्ट्रीय म्हामार्गा वयल्या पुलाच्या मदेकांत ही मोटार पावतकूच अचकीत मोटारीच्या इंजिनान पेट घेतलो. तेच बरोबर मोटारींतले चारूय प्रवासी रोखडेच सकयल देंवले आनी तांणी आपलें सामानूय भायर काडून सुखरूप थळार धांव घेतली.
तो मेरेन मोटारीच्या दर्शनी भागान पेट घेतिल्लो. पळयतां पळयतां पुराय मोटारीन पेट घेतलो. घडणुकेची म्हायती म्हापशें उजो पालोवपी दळाक दिली. दळाचे उपअधिकारी अशोक परब हांच्या फुडारपणा खाला जवानांनी घडणूक थळार धांव घेवन उदक आनी फोमाचो फवारो मारून उजो पालयलो. तो मेरेन पुराय मोटार लासून गोबर जाल्ली.
मजगतीं, ह्या मोटारींतले चारूय प्रवासी हे पुण्यां सावन गोंया पर्यटना खातीर आयिल्ले. गोंयच्यान परतून वता आसतना ही घडणूक घडली. हे चारूय पर्यटक मूळ आंध्र प्रदेशांतले आसून नोकरे निमतान ते पुण्यां राबित्याक आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
