भांगरभूंय | प्रतिनिधी
33 जाणांक अटक, 14 लाखांचें कम्प्युटर आनी हेर म्हालवज जप्त
भांगरभूंय I प्रतिनिधी
पणजी : गोंय पुलिसांच्या गुन्यांव फांट्यान कोलवाळे कवीश रेसिडन्सीच्या तळमाळयेर धाड घालून बनावट कॉल सेंटराचेर कारवाय केल्या. अॅमेझॉनच्या अमेरिकेंतल्या गिरायकांची म्हायती एकठांय करून तांच्या नांवार म्हारग इलेक्ट्रॉनीक वस्तू खरेदी करपाच्या निमतान ही टोळी फटवणूक करताली.
ह्या प्रकरणांत मुख्य सुत्रधार जीगर परमर (35, मूळ अहमदाबाद) हाचे सयत 33 जाणांक अटक केल्या. तांचे कडल्यान गुन्यांव फांट्यान सुमार 14 लाख रुपया मोलाचें 26 कम्प्युटर, 10 राऊटर आनी हेर वस्तू जप्त केल्यात.
गुन्यांव फांट्यान दिल्ले म्हायती प्रमाण, कोलवाळे कवीश रेसिडेन्सीच्या तळमाळयेर बनावट कॉल सेंटर सुरू आशिल्ल्याची म्हायती गुन्यांव फांट्याच्या एका वरिश्ठ अधिकाऱ्याक मेळिल्ली. तशेंच संबंदींत कॉल सेटरा वरवीं अमेरिकन नागरिकांची फटवणूक करताले, अशी म्हायती मेळिल्ली. ते प्रमाण गुन्यांव फांट्याचे पुलीस अधिक्षक निधीन वाल्सन हांच्या मार्गदर्शना खाला पुलीस उपअधिक्षक सुरज हळर्णकार हांच्या फुडारपणा खाला पुलीस पंगडान सोमारा मध्यान रातीं 12.45 ते फांतोड्डेर 5 वरां मजगतीं ही कारवाय केली.
पुलिसांनी मुख्य सुत्रधार जीगर परमर हाचे सयत 33 जाणांक ताब्यांत घेतल्या. हातूंत पांच बायलांचो आस्पाव आसा. आरोपी आड भादंसंच्या 419, 420 आरडब्ल्यू 120 बी आनी म्हायती आनी तंत्रज्ञान कायदाचें कलम 66सी आनी 66डी खाला गुन्यांव दाखल करून अटक केल्या.
अटक केल्ल्या सगल्या दुबावितांक पुलीस कोठडे खातीर मंगळारा म्हापशें पयलो वर्ग न्यायालयांत हजर केले. न्यायालयान मुख्य सुत्रधार जीगर परमर हाका चार दीस पुलीस कोठडी जाल्यार हे दुबावितांक न्यायालयीन कोठडेंत दवरपाचो आदेश
दिला.
मजगतीं, संबंदींत इमारत म्हापशेंचे नगरसेवक तारक अारोलकार हांचे मालकीची आशिल्ल्याची म्हायती गुन्यांव फांट्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
