भांगरभूंय | प्रतिनिधी
इंडियन प्रिमीयर लिगेचे (आयपीएल) णववे मॅचींत येजमान कोलकाता नायटरायडर्सान रॉयल चॅलेंजर्स बंगळुरूक 81 धांवड्यांनी हारयलो. कोलकाता नायट रायडर्सान दिल्ली 205 धांवड्यांचे मोखीचो फाटलाव करपी रॉयल चॅलेंजर्स बंगळुरूक 17.4 ओव्हरींनी 123 धांवड्यां मेरेन मजल मारप शक्य जालें.
मोखीचो फाटलाव करतना विराट कोहलीन पयल्याच बॉलाचेर चवको मारून आपले इरादे स्पश्ट केले. पूण, पयल्या तीन ओव्हरींनी विराट कोहली आनी फाफ ड्यू प्लेसीस हांणी सादूरतायेन बॅटींग केली. पूण, टिम सावथीन घाल्ले चवथे ओव्हरींत कोहली आनी ड्यु प्लेसीस हांणी 23 धांवड्यो केल्यो. ते उपरांत नितीश राणान बॉलिंगेंत बदल करून सुनील नरेनाक पांचवी ओव्हर घालपाक आपयलो. ताणें कोहलीक (21) बोल्ड करून बंगळुरूक पयलो धपको दिलो. ते उपरांत वरुण चक्रवर्तीन ड्यु प्लेसीसाक (23) बोल्ड करून बंगळुरूक रोखडोच दुसरो धपको दिलो.
ते उपरांत ग्लॅन मॅक्सवॅल (5) आनी हर्षल पटेल (0) हांकां बाद करीत चक्रवर्तीन बंगळुरूक अडचणीत हाडलो. जाल्यार सुनील नरेनान आपली दुसरी विकेट घेतना शाहबाझ अहमदाक तंबूंत धाडून बंगळुरूक पांचवो धपको दिलो.
ते उपरांत बंगळुरूक चड वगत मैदानांत तग धरपाक जमलें ना आनी ताचो डाव 123चेर सोंपलो.
ते पयलीं अडखळती सुरवात आनी डावाच्या मध्याचेर 5 बाद 89 अशी अवस्था जाल्ली आसतना शार्दुल ठाकूर आनी रिंकू सिंग हांणी केल्ले आक्रमक शेंकड्याचे भागिदाच्या नेटार कोलकाता नायट रायडर्सान टॉस हारल्या उपरांत पयलीं बॅटींग करतना धांवड्यांचो दोंगर उबारलो. दोगांयनी सवे विकेटी खातीर 103 धांवड्यांची भागिदारी केली.
शार्दुल ठाकूरान फकत 20 बॉलांनी अर्द शेंकड्याची खेळी केली.
रिंकून 33 बॉलांनी 46 धांवड्यो केल्यो. ताणें दोन चवके आनी तीन सके मारले. तो 19वे ओव्हरींत बाद जालो. ते उपरांत शार्दुलान 29 बॉलांनी 68 धांवड्यांची खेळी करून स्कोर दोनश्याच्या हुमऱ्यार पावयलो. हातूंत 9 चवक्यांचो आनी तीन सक्यांचो आस्पाव आशिल्लो. अखेरेक उमेश यादवान चवको मारून कोलकाताक 7 बाद 204 धांवड्यां मेरेन पावयलो.
रॉयल चॅलेंजर्स बंगळुरू वतीन विली आनी करण शर्मा हांणी दरेकी दोन विकेटी घेतल्यो, जाल्यार मोहम्मद सिराज, ब्रेसवेल आनी हर्षल पटेल हांणी दरेकी एक बॅट्समन बाद केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
