भांगरभूंय | प्रतिनिधी
रोना ल्हवू ल्हवू उणो जावपाक लागला. हालींच सरकारान बुस्टर डोस, तोय फुकट दिवपाक सुरवात केल्या. मात, ताका लोकांचो व्हडलोसो प्रतिसाद मेळूंक ना. ते खातीर आतां सरकारान बायलां आनी भुरगीं उदरगत खात्या वतीन हे मोहिमेक गती दिवपाचें थारायलां. आंगणवाडी सेविका हे विशीं जागृताय करतल्यो. लोकप्रतिनिधी आनी आपसेवी संस्थांनी ह्या कामांत योगदान दिवचें, असो उलो भलायकी मंत्र्यान मारला. समाज आनी राष्ट्रा विशी उपाट मोग आशिल्ल्यो समाज संघटना, संस्था ह्या कामांत फाटीं रावच्यो नात. कोरोना गेला, मात तसो मुळा पसून हुमटून वचूंक ना. कारण दरदिसा 40 ते 80 च्या आसपास नवे दुयेंती मेळटात. लोकांच्या मनांतलो भंय मात गेला. भोवतेकांनी सगले नेम कुशीक दवरून भियेनासतना वावुरपाक सुरवात केल्या. आमचे बांहा ही मुक्त जीण चालू आसतनाच तेवटेन संवसारांत मंकीपाॅक्साचें दुयेंस पातळ्ळें. आमच्या देशांतूय तें घुसलां. संयुक्त अरब अमिरातींतल्यान केरळाक आयिल्ल्या एका भारतीयाक हें दुयेंस जालें. उपरांत आनीक दोगजाण तातूंत फारावले. आतां दिल्लींतूय मंकीपाॅक्साचो एक दुयेंती सांपडला. कोरोनाचो पयलो दुयेंतीय केरळांत मेळिल्लो, हो योगायोग.
मंकीपाॅक्स दुयेंस 75 देशांनी पातळ्ळां. सादारण 20 हजार लोकांक तें जालां. हें दुयेंस सध्या दोन तरांचें आसा. कोंगो आनी प. आफ्रिका स्ट्रेन. कोंगो मंकीपाॅक्स जायत जाल्यार मरपाची शक्यताय 10 टक्के आसता. मात अजून मेरेन तरी कोणाकूच मरण येवंक ना, ही तांतले तातूंत बरी गजाल. हें दुयेंस जाल्ल्या जनावरान मनशाक घांस मारलो जाल्यार ताका तें जावं येता वा त्या जनावराच्या रक्ता कडेन, आंगाची ल्हंव, मुता कडेन संपर्क आयल्यार तो जावं येता. मांस सारकें शिजोवन खावंक ना जाल्यारुय जावं येता. दुयेंत मनशाचो तुवालो, कपडे, चादर वापरल्यार ताचो संसर्ग जावं येता. शिंको आनी खोंकलीय तशी धोक्याची. दोतोरांच्या मतान, कांय वेळार ह्या दुयेंसाची लक्षणा 21 दिसांनी दिसतात. जोर, आंग दुखप, तकली फोडप, सामकें पुरो जावप…. हीं. उपरांत आंगार खरचटल्या सारके दाग पडटा. कांय जाणांक फुगांव आयिल्ले भशेन फोड येतात आनी मागीर ते सुकतात. सादारण दोन ते चार सप्तकां हें दुयेंस उरता. मंकीपाॅक्स खास करून भुरग्यांक जावं येता. दुयेंतीक हाॅस्पिटलांत वेगळो दवरतात. अमेरिकेंत सध्या देवी (एक दुयेंस, जें कांय वर्सां पयलीं नश्ट जालें.) वयलें वासीन ह्या दुयेंसाचेर वापरप सुरू जालां. तें 85 टक्के परिणामकारक थारलां.
केंद्रीय भलायकी विभागान जीं कितें मार्गदर्शक तत्वां सांगल्यांत, तीं सगलीं चालीक लागल्यांत. गोंयांत मंकीपाॅक्साचें दुयेंस आडावपाक सरकारी दोतोरांचो पंगड सज्ज आसा, अशी म्हायती राज्याची भलायकी संचालक दोतोर गीता काकोडकार हांणी दिली. भलायकी संघटनेन हें दुयेंस संवसारीक आणीबाणी म्हूण जाहीर केलां. म्हणटकच आमकां सादूर रावचेंच पडटलें. गोंयाक जाल्यार चडूच. कारण, गोंय हें पर्यटन राज्य. पावशी हंगाम आसलो तरी हांगा अजून पर्यटकाचीं भिरीं दिसपाक लागल्यांत. एकमेकांक खेटून भोंवपाक लागल्यांत. ‘गॅम्बलिंग्स ओन सीटीं’त तर सांजवेळ जालो काय जुगाऱ्यांच्यो घिट्टी पडटात. शिस्त आनी नेम पाळपाचे बाबतींत चड भाश्य ना केल्लें बरें. आतां दिल्ली आनी केरळ दात्यांत आसात आनी आमी सगले सुपांत, इतलोच कितें तो फरक! दोतोरांच्या पंगडांत आतां पसूनच ह्या दुयेंसा विशीं जागृताय करपाक जाय. गोंयांत दरेकल्याच्या हातांत मोबायल फोन, तातूंत सोशल मिडिया आसली तरी दुयेंसा सारक्या गंभीर प्रकारांची म्हायती वाचपी लोक उणेच. ल्हान भुरग्यांचें नाक दाबून ताच्या तोंडांत वखद घालतालें, तशें करून लोकांक म्हायती दिवची पडटा. शिस्त लावची पडटा. स्वता जावन शिस्त पाळपी खूब कमी लोक आसतले. फाटल्यान हुलोप बसले बगर कोण जागे जायनात. तेन्ना सरकारी यंत्रणांक खंबीर रावचें पडटलें. आतां 10 आॅगस्टाक पंचायत वेंचणुको आसात, 12 वेर मतदान. थंय गर्दी जातली. गोंयांत मंकीपाॅक्स येवचो न्हय. पूण तो जर आयलो आनी ती दुयेंत व्यक्ती गर्देंत भितर घुसली आनी तिणें माकडचेश्टा केल्यो, जाल्यार मंकीपाॅक्स पातळपाक वेळ लागचो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.