भांगरभूंय | प्रतिनिधी
पत्रभूंय
डाॅ. प्रमोद सावंत,
मानादिक मुख्यमंत्री,
कोयर वेवस्थापन यंत्रणा देस, राज्यां खातीर म्हत्वाची आसता. कोयर वेवस्थे पासत केंद्रीय पर्यावरण खात्या खाला नेमावळ आसा. ती राज्यां मेरेन पावोवन शिस्तीन चालीक लावप गरजेचें. ‘तुज्या आंगणातलो, घरांतलो कोयर म्हाका नाका, म्हज्या घरांतलो, आंगणातलो कोयर तुका नाका’ हो बोवाळ गोंयांत साळगांव कोयर वेवस्थापन प्रकल्पा आदीं जालो. आयजय जाता, ओल्ड गोवावरी दायज थळा लागीं कोयर वेवस्थापन प्रकल्प नाका अशें थंयच्या नागरिकांक दिसतले. दायज थळार पर्यटकांचे चोंबे सदांच आसतात, वेवसाय आनी कोयरय जाता. रायबंदर, ओल्ड गोवा कोयर वेवस्थापन प्रकल्पा पासत सरकारान जागो राखून दवरला. लागसल्ल्या जाग्यार कसलीच उदरगत जावची ना ही जतनाय घेवन तो प्रकल्प फुडें व्हरपाची गरज आसा. शारांतल्या कोयराचो विलो शारांत लावपा पासत मुखेल शारांनी जागे सोदून कोयर वेवस्थापनाची येवजण मार्गार लावची.
प्लास्टिक कोयर मुखेल करुन बाटल्यो, पोतयो, ग्लासांक पर्याय आसा. तांचो उपेग कसो करप तें थळाव्यांक, राज्यांत येवपी पर्यटकांक शिकोवन जागें करचें पडटलें. कुरवांच्या बोर्डां परस अक्षरांच्या तक्त्यांनी मेकळे सुवातेर, दर्यादेगेर येवकार दिवपाक जाय. राजभास, राश्ट्रभासेंतल्यान हे तक्ते आसचे. कोयर खंय उडोवचो तें तक्त्यार चार उतरांनी (शब्द) सांगचें. पुलीस, पर्यटन खात्यांतल्या राखणे दळाक व्हड पर्यटन थळांचेर दवरचें. देसांतल्या हेर पर्यटन थळांनी कोयर वेवस्थापनाचो वावर कसो चलता ताचो अभ्यास जावचो.
2016 वर्सा गोंय प्लास्टिकमुक्त करपाची घोशणा जाल्ली. पुराय येवजण करुन घोशणा केल्यो जाल्यारय त्यो जैतवंत जावंक कळाव लागता. 2026 वर्समेरेन गोंय प्लास्टिकमुक्त करपापासत वावुरचें पडटलें. ग्रीन काॅरिडाॅर, ग्रीन उर्जा प्रकल्प कोयर वेवस्थापनांतल्यान जाल्यार ते देसाक आदर्श ठरतले. एक घेतल्यार एक फुकट अशा येवजणींतल्यान घरांत कपडे, आयदनांचो कोयर वाडटा. तो रस्त्यार उडोवचो न्हय अशी शिटकावणी नागरीकांक दिवची पडटली. नाका आशिल्लीं आयदनां, कपडे खंय उडोवचे, एकठांय जातले तेंय सांगचें.
– सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
