भांगरभूंय | प्रतिनिधी
बेतोडेंच्या लोकांची ग्रामसभेंत मागणी
भांगरभूंय । प्रतिनिधी
फोंडें: दत्तगड वाठारांत 90- 95 टक्के काम पुराय जाल्लें कोयर प्रकल्पाचें काम पुलीस बंदोबस्तांत पुराय करचें, बोणबागच्या सरकारी मुळाव्या विद्यालया कडेन आशिल्ल्या कावला अड्ड्याक लागून विद्यार्थ्यांक त्रास जाता, ताका लागून ताची संयुक्तपणान पळोवणी करची, तशेंच हेर म्हत्वाचे थाराव आयतारा बेतोडें पंचायतीचे ग्रामसभेंत घेतले. ग्रामसभेंत सरपंच मधू खांडेपारकार आनी थळावे लोक हांचे मदीं वाद जाल्ल्यान कांय वेळ तणाव निर्माण जालो.
सरपंच मधू खांडेपाराकार हांचे अध्यक्षते खाला जाल्ले ग्रामसभेंत गट विकास कार्यालयाची अधिकारी पद्मिनी शिरोडकार, सचीव आशिष नायक, उपसरपंच चित्रा सालेलकार आनी हेर पंच हाजीर आशिल्ले.
दत्तगड वाठारांत कोमुनादीदची जमीन ताब्यांत घेवन आत्मनिर्भर भारत खाला कोयर प्रकल्प उबारलो. सुमार 90 टक्के काम पुराय जाले उपरांत कांय थळाव्या लोकांनी प्रकल्पाक विरोध करपाक सुरवात केली. ताका लागून कांय म्हयन्याच्यान काम बंद दवरलां. कंत्राटदारान हे संबंदांत लोक कामा करपाक दिनात अशी म्हायती दिली. ताका लागून आयतारा जाल्ले ग्रामसभेंत पुलीस संरक्षण घेवन काम पुराय करपाचो थाराव लोकांनी घेतलो.
बोणबागच्या सरकारी मुळाव्या विद्यालया लागसार आशिल्ल्या कावलां अड्ड्याक लागून विद्यार्थ्यांच्या अभ्यासाचेर परिणाम जाता. कावलां अड्ड्याच्या आवाजाक लागून विद्यार्थ्यांचे मन अभ्यासांत लागना. ताका लागून पंचायत आनी लोकांनी संयुक्त तरेन पळोवणी करून कारवाय करपाचो थाराव लोकांनी घेतलो. ग्रामसभा चालू आसतना सरपंच मधू खांडेपारकार आनी हेर लोकां मदीं वाद जालो. ताका लागून ग्रामसभेंत कांय वेळ तणाव निर्माण जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
