भांगरभूंय | प्रतिनिधी
म्हापशें: म्हापशें पालिका प्रभाग 1 ते 10 ह्या प्रभागांतल्या घराघरांतलो कोयर एकठांय करपाचो दिल्लो कंत्राट ऑगस्टांत सोंपलां. हे विशीं चर्चा करून निर्णय घेवचे खातीर पालिका मंडळाची खाशेली बसका शुक्रारा 21 ऑक्टोबराक आपयल्या.
कोयर एकठांय करपाच्या कंत्राटाक मुजतवाड दिली ना जाल्यार सेवा बंद करपाची शिटकावणी सप्टेंबराच्या निमाण्या सप्तकांत कंत्राटदार बावीश वेस्ट मॅनेजमेंट सर्व्हीस प्रायव्हेट लिमिटेड कंपनीन दिल्ली. हे संबंदीचें निवेदन तांणी नगराध्यक्ष आनी मुख्याधिकाऱ्याक दिल्लें.
वयल्या 10 प्रभागांतलो कोयर एकठांय करपाचें 1.28 कोटींचें कंत्राट हे कंपनीक पालिका मंडळान दिल्लें. ही कंपनी फाटल्या 27 ऑगस्ट सावन कोयर एकठांय करपाचें काम करता. पूण हे कंत्राट 26 ऑगस्टाक सोंपलां. ताका लागून कंत्राटाचे मुजतवाडीचो विचार करचो, अशी मागणी कंपनीन त्या निवेदनांत केल्ली. कंत्राट सोंपले तरीय आमी नैतिकतेच्या आदाराचेर सेवा चालू दवरल्या. कोयर एकठांय करिनासतना रावप ही एक गंभीर समस्या. आगावू सुचोवणी दिनासतना काम बंद करपाची परवानगी आमचे कंपनीचीं मुल्ल्यां आमकां दिनात. तशेंच समाज आनी सैमा संबंदीची आमच्या नैतीक आनी मुल्ल्यांची जापसालदारकी पुराय करपाक एका म्हयन्याचो काळ फावोसो आसा. ताका लागून मुजतवाडी विशीं पालिके कडल्यान गरजेची सुचोवणी मेळ्ळी ना जाल्यार सेवा बंद करपाचो विचार करतले, अशेंय कंपनीन म्हणिल्लें.
पालिकेन दिल्ली एका म्हयन्याची मुजतवाड
म्हापशें पालिका मंडळाचे फाटले बसकेंत म्हापशें पालिका वाठारांतल्या 1 ते 10 वॉर्डांतलो कोयर एकठांय करपाच्या कंत्राटाक एका म्हयन्याची मुजतवाड दिल्ली. ही मुजतवाड सोंपिल्ल्यान पालिका मंडळान हे विशींचो निर्णय घेवचे खातीर ही ताकतिकेची बसका आपयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
