भांगरभूंय | प्रतिनिधी
पणजी, प्रतिनिधी : कोमुनिदाद जमनींतलीं बांदकामां मोडून उडोवपाचे घडणुकेक लागून राज्यांत सध्या बरोच बोवाळ निर्माण जाला. बारा वर्सां आदीं २०११ वर्सा सर्वोच्च न्यायालयाच्या आदेशा उपरांत प्रशासनान सर्वेक्षण करून कोमुनिदाद जमनींतल्या अतिक्रमणांचेर कारवाय करपाचे आदेश दिल्ले. तेन्ना सर्वेक्षण जालेंच ना आनी कारवाय लेगीत जावंक ना, अशी म्हायती कोमुनिदाद समितीच्या वांगड्यांनी दिली.
कोमुनिदादींतल्या बेकायदो बांदकामांचेर सध्या कारवायेची प्रक्रिया सुरू आसा. हे फाटभुंयेर कोमुनिदादींतलीं बेकायदो घरां वाटोवपा खातीर कायदो दुरूस्ती करपाची घोशणा मुख्यमंत्री डॉ. प्रमोद सावंत हांणी केल्या. तांचे हे घोशणेक आगोंद तशेंच हेर कोमुनिदाद जमनींत घरां बांदिल्ल्या लोकांनी येवकार दिला. येवपी अधिवेशनांत कोमुनिदाद जमनींतलीं घरां वाटोवपा खातीर विधेयक येतलें, अशें मुख्यमंत्र्यांनी सांगलां.
बर्याच लोकांनी घरां वाटोवपा खातीर यत्न करपी निवेदनां मुख्यमंत्र्यांक सादर केल्यांत. कोमुनिदादी कडल्यान मात आदेशा प्रमाण बेकायदो बांदकामांचेर कारवायेची मोहीम सुरूच आसा. कोमुनिदाद समित्यां कडेन बेकायदो घरां वा अतिक्रमणांची म्हायती ना. जिल्होधिकार्यांच्या आदेशा उपरांत कोमुनिदाद प्रशासकांनी कोमुनिदाद समित्यां कडेन बेकायदो घरां वा अतिक्रमणांची म्हायती मागल्या. बेकायदो घरां वा अतिक्रमणांचो आंकडो कळपा खातीर सर्वेक्षणाची गरज आसा. मनीसबळ आनी सर्वेक्षक नाशिल्ल्यान सर्वेक्षण करप कोमुनिदाद समित्यांक आतां अशक्य जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
