भांगरभूंय | प्रतिनिधी
कोमुनिदाद कायदो 372 – ए खाला जारी जाल्ली अधिसुचोवणी
भांगरभूंय । प्रतिनिधी
पणजी: कायद्यांत दुरुस्ती करून कोमुनिदाद जमनींतलीं घरां कायदेशीर करपाची घोशणा मुख्यमंत्री डॉ. प्रमोद सावंत हांणी केल्या उपरांत गोंयांत खवदळ पडला. कोमुनिदाद जमनींत घरां आशिल्ल्यांनी हे घोशणेक येवकार दिला. विरोधी पक्षांनी मात घरां कायदेशीर करपाचे घोशणेचेर टिका केल्या. हाचे आदीं 2001 त सर्गेस्त मनोहर पर्रीकार मुख्यमंत्री आसतना कोमुनिदाद कायद्याच्या कलम 372- ए खाला बांदकामां नियमीत करपा विशीं अधिसुचोवणी जारी जाल्ली. तेन्ना प्रक्रिया पुराय जावंक पावली ना. आतां 22 वर्सां उपरांत कोमुनिदाद जमनींतलीं घरां कायदेशीर करपाची घोशणा भाजप सरकाराच्या मुख्यमंत्र्यांनी केल्या.
कोमुनिदाद कायद्याच्या कलम 372- ए कलमा खाला 5 नोव्हेंबर 2001 ह्या दिसा ही अधिसुचोवणी जारी जाल्ली. सर्गेस्त मनोहर पर्रीकार हे तेन्ना मुख्यमंत्री आशिल्ले जाल्यार सर्गेस्त फ्रांसीस डिसोझा हे येणावळ खात्याचे मंत्री आशिल्ले. हे अधिसुचवणे प्रमाण जिल्होधिकाऱ्यांनी कोमुनिदाद प्रशासकांक बांदकामां नियमीत करपाचे अर्ज घेवन प्रकिया सुरू करपाचे आदेश दिल्ले. तशेंच कोमुनिदाद प्रशासकांनी कोमुनिदादींक आयिल्ले अर्ज सादर केल्ले. कोमुनिदाद जमनींतलीं घरां वा बांदकामां नियमीत करतलो जाल्यार कोमुनिदाद समित्यांची मान्यताय गरजेची आशिल्ली. मान्यताये खातीर कोमुनिदाद प्रशासकांनी अर्ज कोमुनिदादीं कडेन धाडिल्ले. म्हापशें कोमुनिदादी कडेन कोमुनिदाद प्रशासकांनी 19 अर्ज धाडिल्ल्याची नोंद मेळटा. हेर कोमुनिदादीं कडेन लेगीत प्रशासकांनी अर्ज धाडिल्ले. कांय कोमुनिदादींनी हे अर्ज प्रशाकांक परत धाडिल्ले. कांय जाणांनी धाडूंक ना. विधानसभा वेंचणूक तशेंच सरकार बदलांक लागून फुडें ही प्रक्रिया शेळेली, अशी म्हायती कोमुनिदाद प्रशासनांतल्या गोपां कडल्यान मेळ्ळ्या.
बेकायदा बांदकामांची नोंद ना
2011 त बेकायदो बांदकामां वा घरां नियमीत करपा विशींची अधिसुचोवणी जारी जाल्ली. हे अधिसुचोवणेक लागून जिल्होधिकाऱ्यांनी कोमुनिदाद प्रशासकांक घरां नियमीतत करपा खातीर अर्ज घेवपाचे आदेश दिल्ले. आयिल्ल्या अर्जांक मान्यताय घेवपा विशींची प्रक्रिया सुरू करपाचे आदेश कोमुनिदाद प्रशासकांनी कोमुनिदादींक दिल्ले. अर्ज घेवन बांदकामां नियमीत करपाची ही प्रक्रिया आशिल्ली. कोमुनिदाद जमनींतलीं बेकायदो घरां वा बांदकामां हांचें सर्वेक्षण केन्ना जावंक ना. कोमुनिदादींनी तें करूंक ना. सर्वेक्षण करपा इतलें मनीसबळ वा यंत्रणा कोमुनिदादीं कडेन ना. हाका लागून बेकायदो बांदकामां वा घरां हांचो आंकडो कोमुनिदादीं कडेन ना. कांय जाणांनी कोमुनिदादीं कडेन प्लॉटा खातीर अर्ज केल्ले. कोमुनिदादींनी प्लॉटांची विक्री केल्ली. हाची नोंद कोमुनिदादीं कडेन आसतल्यो. अतिक्रमणां कोणे आनी कशी केली? हाची नोंद ना, अशी म्हायती कोमुनिदादींच्या वांगडयां कडल्यान मेळ्ळी.
कोमुनिदाद जमनींतली घरां वा बांदकामां हाचें सर्वेक्षण हाचे आदीं केन्ना जावंक ना. तें जावप गरजेचें आसा. सर्वेक्षण करप सरकाराक शक्य आसा. कोमुनिदादींक ना, अशें मत म्हापसा कोमुनिदादीच्या वांगड्यांनी उक्तायलें.
बांदकामां, घरांचें सर्वेक्षण करचें: तुलियो डिसोझा
कोमुनिदाद जमनींतलीं घरां तशेंच बांदकामांचें सर्वेक्षण करपाची गरज आसा. कोमुनिदाद जमनींत कितलीं घरा वा बांदकामां आसात, ताची नोंद कोणा कडेन ना. सर्वेक्षण केलें जाल्यार बेकायदो बांदकामां वा घरांचो आकडो कळटलो, अशें गिरी कोमुनिदाद समितीचे अध्यक्ष तुलियो डिसोझा हांणी सांगलें. बेकायदो बांदकामां कायदेशीर करपा परस ताचेर नियंत्रण दवरपाचे यत्न सरकारान करचें, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
